Torpaqların Elektron Kadastr Uçot Sisteminin nəticələrinə əsasən kəndlilərə pay torpaqları ayrılıb

“Azerinfo”-nun Şimal Bürosu xəbər verir ki, Azərbaycanda ilk dəfə həyata keçirilən bu sistemdən Xaçmaz rayonunun Müqtədir qəsəbə sakinləri faydalanıb. 50-yə yaxın vətəndaşa mülkiyyət hüququnu təsdiq edən sənədlər təqdim edilib. Prezident İlham Əliyevin müvafiq fərmanı ilə yaradılan Əmlak Məsələləri Dövlət Komitəsi tərəfindən Torpaqların Elektron Kadastr Uçot Sistemi daha bir ilkə imza atıb. Xaçmazın Müqtədir qəsəbəsində yaşayan torpaq payı almış 50-ə yaxın vətəndaşa mülkiyyət hüququnu təsdiq edən çıxarışlar verilib. Nazirlər Kabinetinin müvafiq sərəncamı ilə, Müqtədir qəsəbəsinin və Vələmir kəndinin torpaq payı almaq hüququ olan əhalisinə 531,24 hektar pay torpaq sahələri ayrılıb. Xaçmaz rayon İcra Hakimiyyəti ilə birlikdə aparılan islahat nəticəsində ərazidə mövcud olan 604 ailədən ibarət 2 min 315 subyektin hər birinə 0,18 hektar pay torpaq sahəsi verilib. Vətəndaşlar qeyd edib ki, verilən bu torpaqlar onların yaşayış səviyyəsini daha da yaxşılaşdıracaq. Pay torpaqları əldə edə bilməyən şəxslərə pay torpaqlarının verilməsində məqsəd kənd təsərrüfatı məhsullarının artırılması, əhalinin ərzaq təminatının yerli istehsal hesabına ödənilməsini təmin etməkdir. Bundan başqa pay torpaqlarına çıxarışların verilməsi həm kəndlinin fəaliyyətini stimullaşdırır, həm də aqrar sahədə məşğulluq səviyyəsinin yüksəldilməsinə şərait yaradır.

Xanlar Cəbrayılzadə