Azerinfo xəbər verir ki, mayın 26-da Quba Regional Perinatal mərkəzində KİV nümayəndələri üçün həyata keçirilən ana südü ilə qidalanmanın əhəmiyyətinə dair növbəti seminar kecirlib.

Səhiyyə Nazirliyinin BMT-nin Uşaq Fondu ilə əməkdaşlığı çərçivəsində təşkil olunan seminarda KİV nümayəndələri ilə yanaşı şimal bölgəsinin tibb müəssisələrinin mama-ginekoloqlar da iştirak ediblər.
Tədbirdə Quba Regional Perinatal mərkəzin direktoru Şəhla Həsənova və mama-ginekoloqlar ana südü ilə qidalanmanın həm ana, həm də uşaq sağlamlığı üçün əhəmiyyəti barədə məlumat veriblər. Bildirilib ki, Səhiyyə Nazirliyi bu sahədə həyata keçirdiyi silsilə tədbirlər sırasında maarifləndirmə tədbirlərinə xüsusi diqqət yetirir.

Daha sonra seminar iştirakçılarına məlumat verilib ki, statistikaya görə, 1992-ci ilədək Azərbaycanda bir yaşadək uşaqların cəmi 25 faizi ana südü ilə qidalanırdı. Səhiyyə Nazirliyinin səyləri nəticəsində həmən rəqəm indi 50 faizədək yüksəlib.

Çıxış edənlər qeyd ediblər ki, ana və uşaqların sağlamlığının qorunması üzrə Dövlət Proqramı çərçivəsində tibb müəssisələrinin maddi-texniki bazası daha da möhkəmləndirilir, dərman preparatları və tibbi texnika ilə təminat yaxşılaşdırılır. Seminarda qadınların hamiləlikdən əvvəl müayinə olunmaması, mütəxəssislərdən məsləhət almaması, daxili somatik xəstəliklərin vaxtında müalicə edilməməsi, hamiləlik dövrü yaşadığı ailədaxili və sosial problemlərin doğuş zamanı fəsadlar törətdiyi barədə də müzakirələr aparılıb.
Ana südü ilə qidalanmanın vacibliyinin mətbuatda peşəkarlıqla işıqlandırılması və əhalini maarifləndirilməsində KİV nümayəndələrinin məlumatlı və hazırlıqlı olması məqsədilə seminarda suallar ətrafında fikir mübadiləsi aparılıb.

Xanlar Cəbrayılzadə