Dövlət satınalmalarını həyata keçirərkən sifarişçi və podratçı təşkilat arasında gedən “otkat” oyunları barədə informasiyalar çox kəslərə məlumdur.

Yenicag.az olaraq bu istiqamətdə apardığımız çoxsaylı araşdırmalar demək olar ki, başa çatmaqdadır.

Apardığımız araşdırmalara görə, Xaçmaz rayon icra hakimiyyəti başçısının Xudat İnzibati Ərazi Dairəsi üzrə Nümayəndəliyi tərəfindən elan olunan müsabiqələrdə ən çox qazanan, “Tural – 2009” Məhdud Məsuliyyətli Cəmiyyəti. 2010-2015-ci illər ərzində 16 dəfə, ümumilikdə 245 890 manat dəyərində dövlət satınalmaları ilə bağlı keçirilən tenderin qalibi olub.

Beləki, bu təşkilat 2011- ci ildə:

“Sair xərclər üzrə satınalmalar üçün” – 10 880 manat,

“Əsaslı təmir üzrə satınalmalar üçün” – 44 970 manat,

“Digər mallar üzrə satınalmalar üçün” – 11 700 manat,

“Yumşaq inventarların satınalınması üçün” – 8 510 manat,

“Kommunikasiya xidmətlərinin satınalınması üçün” – 4 140 manat,

“İstilik – odun satınalınması üçün” – 7 540 manat,

“Cari təmirlərin satınalınması üçün” – 3 150 manat,

“Təsərrüfat mallarının satınalınması üçün” – 16 420 manat,

“Dəftərxana materiallarının satınalınması üçün” – 8 280 manat – olmaqla 9 dəfəyə 115 590 manatlıq satınalmalarda qalib olub.

2012-ci ildə isə “Tural – 2009” MMC:

“Avadanlıqların satın alınması üçün” – 2 900 manat,

“İnventarların satın alınması üçün” – 4 000 manat,

“Kommunal və kommunikasiya xidmətlərinin satın alınması üçün” – 15 600 manat
olmaqla, 3 dəfə qalib olub.

2013-cü ildə isə adıçəkilən kommersiya qurumu:

“Mənzil fondunun əsaslı təmir işlərinin satın alınması üçün” – 39 500 manat,

“Abadlıq işlərinin satın alınması üçün” – 47 500 manat,

“Kommunal və kommunikasiya xidmətlərinin satınalınması üçün” – 17 000 manat,

“İdarənin digər xərcləri maddəsi üzrə malların (işlərin və xidmətlərin) satın alınması üçün” – 3 800 manat
olmaqla, cəmisi 4 dəfə qalib olub.

Qalib firma icra nümayəndəsinin evində yerləşir?!

Apardığımız araşdırmalar zamanı məlum olub ki, “Tural-2009” MMC (VÖEN 7700569131) 2009-cu ilin yanvar ayının 13-də dövlət qeydiyyatına alınıb. Qeydiyyat sənədlərində qurumun hüquqi ünvanı : Xaçmaz rayonu, Xudat şəhəri, Şəhriyar küçəsi ev 53 , qanuni nümayəndəsi isə Şıxmuradova Nailə Məclum qızı göstərilib.










Araşdırmalar onu göstərir ki, qurumun yerləşdiyi və ya hüquqi ünvan kimi təqdim etdiyi Şəhriyar küçəsi 53-də yerləşən ev, əvvəllər Xudat şəhər İƏD-nin icra nümayəndəsi çalışmış, hazırda isə Xaçmaz rayonu, Alekseyevka kəndi üzrə İƏD-də nümayəndə vəzifəsində çalışan Hacızadə Murad Abdulhey oğluna məxsusdur. Adıçəkilən ünvanda qeydiyyatda özü və iki nəfərdən ibarət ailəsi qeydiyyatdadır. Həmçinin məlum olub ki, şirkətin adı da təsadüfən qoyulmayıb. Beləki, şirkət icra nümayəndəsinin oğlunun adı da Tural Hacızadədir.

Xaçmaz rayon icra hakimiyyətinə Xudad şəhər İƏD nümayəndəliyində 2010-2015-ci illərdə işləmiş şəxslərin siyahısı ilə bağlı sorğumuza cavab olaraq Murada Hacızadənin Xudat şəhər 25.02.2013-cü ilə kimi İƏD nümayəndəsi işlədiyini bildiriblər. Şıxmuradova Nailə isə mühasibdir.

Sorğumuza verilən cavabda bildirilir ki, Murad Hacızadə hazırda Alekseyevka İƏD üzrə nümayəndə vəzifəsində çalışır, Nailə Şıxmuradov isə hazırda şəhər İƏD nümayəndəliyində mühasib işləyir.








Daha maraqlı məqam ondan ibarətdir ki, qurumun hüquqi təmsilçisi kimi adının sənədlərdə yer tutduğu Şıxmuradova Nailə Məclum qızı uzun illərdir ki, Xudat İƏD-də mühasib vəzifəsində çalışır.

Onu da qeyd edək ki, Şıxmuradova Nailə bu satınalmalarda həm də fiziki şəxs kimi iştirak edərək müsabiqənin “qalibi” olub. Beləki o, fiziki şəxs olaraq 2014-cü ildə:

“İdarənin digər xərcləri maddəsi üzrə satınalmalar üçün” – 5 390 manat,

“Abadlıq işlərinin satın alınması üçün” – 44 100 manat,

“İnventarların satın alınması üçün” – 6370 manat,

“Mənzil fondunun əsaslı təmir işlərinin satın alınması üçün” – 44 100 manat olmaqla 4 dəfə, toplam 99 960 manatlıq müsabiqələrin qalibi olub.

Nəzərə alsaq ki, qalib nəinki sıradan biri deyil, hətta hüquqi ünvanı icra nümayəndəsinin evi, qanuni təmsilçisi də satınalmanı həyata keçirən təşkilatın mühasibi olan bir təşkilatdır və bu mühasib həm də icra nümayəndəliyinin mühasibidir, onda bu “satınalmaların” nəticəsini təsəvvür etmək çətin deyil.

Görülmüş işlərin nəticəsi və adıçəkilən fiziki və hüquqi şəxslərin başqa hansı dövlət satınalmalarında iştirak etdiyi barədə məlumatları gələn saylarımızda oxuya bilərsiniz…
Yeni Çağ