Qazaxda 2014-cü ilin sosial-iqtisadi inkişafının yekunlarına həsr olunan hesabat yığıncağı keçirilib. İştirakçılar əvvəlcə rayonun sosial-iqtisadi inkişafını əks etdirən stendlərlə və istehsal olunan yerli məhsulların sərgisi ilə tanış olublar. Ötən il 26 min nəfər əhalinin yaşadığı 15 yaşayış məntəqəsini birləşdirən Qazax-Quşçu Ayrım avtomobil yolu istifadəyə verilib. Qazax-Kosalar avtomobil yolunun isə tikintisi nəzərdə tutulub. Quşçu Ayrım kəndində 180 şagird yerlik, Məzəm və Bala Cəfərli kəndlərində 80 şagird yerlik məktəb tikilib. Qarapapaq kənd ümumtəhsil orta məktəbi isə təmir edilərək istifadəyə verilib. Heydər Əliyev Fondunun dəstəyi ilə Qazaxdahər kəndində biri 100 yerlik olmaqla 2 ədəd körpələr evi-uşaq bağçası istifadəyə verilib. Kənd təsərrüfatı idarəsinin yeni inzibati binasının tikintisinə başlanılıb. Aslanbəyli və Abbasbəyli kəndlərində əhalinin içməli suya olan tələbatını yaxşılaşdırmaq məqsədilə hər birinin tutumu 16 ton olan 5 ədəd su çəni quraşdırılıb və 4 kilometr uzunluğunda su xətləri çəkilib. Hesabat yığıncağında vurğulanıb ki, rayonda adambaşına düşən ümumi məhsulun həcmi 1374 manat, orta aylıq əməkhaqqı 255 manat olub. 2014-cü ildə rayonda 16 yeni müəssisə yaradılıb, 867-si daimi olmaqla 907 yeni iş yeri açılıb.

kepeztv.az