İsmayıllının Girdiman çayı sahilində yerləşən Lahıc qəsəbəsi Babadağ və Niyaldağ silsilələri ilə əhatə olunub. Bu özəlliyi Lahıca təbii qala şəraiti bəxş edir. Qəsəbənin digər özəlliyi isə tarixi abidələrlə zəngin olmasıdır. Belə abidələrdən ən möhtəşəmi isə 200 ildən çox yaşı olan və Girdiman çayının sahilində yerləşən 72 otaqlı, 2 və 3 mərtəbəli yaşayış binasıdır.

Bu ev 14 il müddətində, Lahıcın memarlığına uyğun olaraq inşa olunub. Binaya iki tərəfdən giriş mümkündür — Bədəvan məscidi tərəfdən və Girdiman çayının sol sahili istiqamətindən. Məscid tərəfdən giriş qənaətbəxş olsa da, Girdiman çayı tərəfdən olan giriş tamamilə dağılıb.

Lahıc Dövlət Tarix-Mədəniyyət Qoruğu elan olunduqdan sonra yerli camaat 72 otaqlı evin dövlət tərəfindən qorunan abidələrin siyahısına daxil olunması üçün müraciət ediblər. Ancaq bu möhtəşəm tarixi abidənin qorunub saxlanılması üçün hələ ki bir iş görülməyib.

Bu tarixi abidə baxımsızlıq ucbatından ildən-ilə dan uçub-dağılır. Bina qəsəbənin strateji hissəsində inşa edildiyindən Lahıcın ala qapısı hesab edilir. Lahıca gələn bütün qonaqlar, yerli və əcnəbi turistlər öncə buranı ziyarət edirlər. Təəssüflər olsun ki, dağılmış, yararsız hala düşmüş tarixi abidə ilə qarşılaşırlar, hətta şəkilini də çəkirlər.

Sputnik Azərbaycan-a danışan yerli sakinlər bildiriblər ki, bu xoşagəlməz vəziyyət onlara çox pis təsir edir: "Bu abidə gün-gündən dağılaraq yarasız vəziyyətə düşür. İstəyirik ki, abidə dövlət tərəfindən təmir edilsin, gələn turistlər bu abidənin dağılmış şəklini yox, daha gözəl şəkillərini çəkib öz ölkələrində təbliğ etsinlər".

Lahıc Tarix-Mədəniyyət Qoruğunun əməkdaşı Nəzər Əliyev isə bildirib ki, Lahıc qəsəbəsinin ən möhtəşəm abidəsi, Girdiman çayının sahilindəki 72 otaqlı, 3 mərtəbəli Hacı Paşa evinin bundan sonrakı aqibəti artıq onun haqqında veriləcək qərardan asılıdır. Ya bu abidə yenidən bərpa olunacaq, ya da tarixin amansız sınağına buraxılacaq və beləcə dağılıb məhv olacaq.

Qeyd edək ki, Lahıc qəsəbəsi Azərbaycanın turizm baxımından öndə gedən məkanlardan biridir. Lahıca dünyanın hər yerindən turistlər təşrif buyururlar. Təəssüf ki, Lahıcın tarixinin danışan nümunəsi olan Hacı Paşa evinin durumunu görəndə istehza edirlər.

Ümid edirik ki, aidiyyatı qurumlar bu xoşagəlməz durumun tezliklə aradan qalxması, həmçinin tarixin canlı şahidi olan abidənin gələcək nəsillərə ötürülməsi üçün lazımi tədbirlər görəcəklər.