Əhalinin maddi rifahının yüksəldilməsi, sosial müdafiənin daha təminatlı şəkildə təşkili istiqamətində həyata keçirilən islahatlar reallaşdıqca bu sahədə hələ də mövcud olan problemlər ketdikcə daha çox çox çılpaqlığı ilə diqqəti cəlb edir.
Azerinfo.az dia.az-a istinadən xəbər verir ki, bu gün əksər rayonlarda fəaliyyət göstərən Əhalinin Sosial Müdafiə Mərkəzlərində baş alıb gedən özbaşnalıqlar, bu mərkəzlərin rəhbərləri tərəfindən vətəndaşların hüquqlarının kobudcasına və kütləvi şəkildə pozulması halları hələ də dövlət islahatlarının tam gücü ilə həyata keçirilməsini əngəlləyən faktorlar kimi çıxış edirlər. Redaksiyamıza daxil olan məlumatlarda ƏSMM-lərin bəzi rayonlardakı yarıtmaz fəaliyyətindən, yol verilən ciddi qanun pozuntularınadan konkret faktlar təqdim olunur. Xüsusən də bu mərkəzlərə rəhbərlik edən şəxslərin özbaşnalığı, aztəminatlı vətəndaşların problemlərinə biganəliyi yerlərdə əhalinin kəskin etrazlarına səbəb olur.Məlum olduğu kimi bir müddət bundan əvvəl Sabirabad ƏSMM-nin keçmiş rəhbərliyi fəaliyyətində yol verdiyi ciddi nöqsanlara görə tutduğu vəzifədən azad olunmuşdu. Bundan sonra müvəqqəti olaraq mərkəzə rəhbərlik edən digər bir kadrın da bu postda “debütü” heç də uğurlu alınmadı. Nəhayət ki, Sabirabad ƏSMM-yə rəhbərlik Vüsal Talıbova həvalə olundu. Lakin yerli mənbələrin iddialarına görə, aradan ötən müddət ərzində mərkəzin fəaliyyəti əvvəl olduğundan da bərbad hala gətirilib. Məsələn, rayon sakinləri tərəfindən təqdim olunmuş məlumatlarda göstərilir ki, kartların ilk altı ay müddətində qanuni sahiblərindən saxlanılması üsulu bu gün də Vüsal Talıbov tərəfindən geniş tətbiq edilir. Məhz bu yolla Sabirabad ƏSMM-nin yeni direktoru aztəminatlı vətəndaşların külli miqdarda pul vəsaitlərini mənimsəməkdə davam edir. Daxil olan məlumatlara əsasən belə qənaətə gəlmək olur ki, hazırda Sabirabad rayonu Əhalinin Sosial Müdafiə Mərkəzi özünün xüsusilə yarıtmaz fəaliyyəti ilə analoji qurumlar arasında daha çox seçilən idarələr sırasındadır. Biz mövzuya dair ötən materiallarda da dəfələrlə vurğulamışıq ki, ölkədə korrupsiyaya qarşı mübarizənin getdikcə daha böyük vüsət alması fonunda ayrı-ayrı məmurların hələ də tam cəzasızlıq şəraitində öz cinayət əməlləri ilə məşğul ola bilmələri onların yuxarı dairələrdə olan güclü himayədarlarının nüfuzundan xəbər verir. Rayondakı mənbələrdən aldığımız məlumatlarda iddia olunur ki, Əmək və Əhalinin Sosial Müdafiə Nazirliyinin əməkdaşları tərəfindən müxtəlif vaxtlarda keçirilmiş yoxlamalar zamanı Vüsal Talıbov tərəfindən saxlanılmış əhaliyə məxsus çoxsaylı sosial yardım kartları aşkar edilmşdir. Lakin ƏSMM direktoru nəinki heç bir cəza almamış, hətta vəzifəsindən belə uzaqlaşdırılmamışdır.Xatırlayırsınızsa, bir müddət əvvəl dərc etdiyimiz materiallardan birində biz qeyd etmişdik ki, Əmək və Əhalinin Sosial Müdafiəsi Nazirliyinin strukturlarında həyata keçirilən islahatlar artıq öz müsbət nəticələrini verməkdədir. Ən azından bu barədə redaksiyamıza bəzi bölgələrdən daxil olan məlumatlarda xəbərlər yer almağa başlayıb. Bu xüsusda yerlərdən aldığımız məlumatlarda bildirilir ki, nazir Səlim Müslümovun apardığı kadr islahatları nəticəsində əhaliyə ünvanlı sosial yardımların verilməsində indiyə qədər mövcud olan bir çox nöqsanların aradan qalırılacağına ümid yaranıb. Təbii ki, bu proseslər hələlik islahatların yalnız gözləntisində olan digər rayonların sakinlərini də ümidləndirib. Bu xüsusda Sabirabaddan daxil olan məlumatlarda da yerli ƏSMM-nin direktoru Vüsal Talıbovun özbaşınalıqlarına son qoyulması məqsədilə təcili tədbirlərin görülməsi tələbi irəli sürülür. Ümid edirik ki, ən qısa müddətdə Əmək və Əhalinin Sosial Müdafiəsi Nazirliyi tərəfindən təqdim olunan məlumatlar ətrafında müvafiq araşdırmalar aparılacaq və rayon sakinlərinin də böyük narazılıqlarına səbəb olmuş bütün bu məsələlərə tam aydınlıq gətiriləcək.