Neft ölkəsi, altı-üstü sərvətlərlə dolu məmləkət, Daşkəsəni qızıl, Bakısı nöyüt, Göyçayı nar, Sabirabadı pambıq, hər yeri zənginliklərlə dolu bir vətən düşünün.

Düşünün ki, bu vətənin 20 faiz torpaqlarının uğrunda müharibənin od-alovunda başından yaralanmış bir Qarabağ qazisi var.

Və düşünün ki, onun 7-ci sinifə gedən övladı neft məmləkətində bayram ərəfəsində Şaxta babadan özünə hədiyyə, şokolad istəmir, atasının dərmanlarını gətirməyi arzulayır.

Düşünə və bu acını hiss edə bilirsinizmi? Qarabağ əlilinin övladının bu qədər varlılar, milyonçular olan dövlətdə Şaxta babadan dərman istəməsini təsəvvür edirsinzmi?

Cahan.info xəbər verir ki, söhbət Abşeron rayonu, Xırdalan şəhərində yerləşən 4 saylı orta məktəbin 7 “ç” sinif şagirdi Nəzrin Ağayevadan gedir. Nəzrinin atası Ağayev Nəriman Qarabağda başından yaralanıb.

Məktəbli qız Şaxta babaya simvolik məktubunda hədiyyə istəmədiyini, atasında dərmanları alıb gətirməsini xahiş edir. Onun üçün ən böyük bayram atasının sağlamlığı, dərmanlarını içə bilməsidir.

Lakin imkansız ailənin bayramqabağı nəinki süfrə açmağa, dərmanları almağa belə pulu yoxdur. Qazi qızının məktubunu feysbukda gənc yazar Leyla Namazova yazıb.
















Onun dediyinə görə, məktəb direktoru ilə əlaqə saxlayıb və onunla görüşəcək. Amma ürəkparçalayan məktubun mahiyyəti məktəb direktoru yox, qızcığazın atasının dava-dərmanını alacaq xeyriyyəçi, vətənpərvər insanlarımızın dəstək verməsidir.

Bu məktubu oxucuların nəzərinə çatdırmaqda niyyətimiz də məhz Nəzrinin Qarabağ əlili olan, vətən üçün sağlamlığını itirən atasına köməklik göstərməkdir.

Azərbaycanda kifayət qədər xeyirxah, yardımsevər, əliaçıq insanlar var. Onlar həmişə ağır vəziyyətdə olan vətəndaşlara, əməliyyata, dərmana ehtiyacı olanlara əl tuturlar.

Həmçinin, prezident və xanımı Mehriban Əliyeva yüzlərlə şəhid ailəsi, köçkünə, Qarabağ qazisinə, aztəminatlı ailələrə dəstək olublar.

Ona görə də bayram ərəfəsində Ağayevlər ailəsinin sevinəcəyinə, balaca Nəzrinin ürək ağrıdan sözlərinə səs veriləcəyinə, Yeni ildə atasının dərmanlarını ala biləcəyinə ümid edirik.

Bunun üçün həmin məktəbə gedə bilərsiniz və yaxud feysbukda Leyla Namazova ilə əlaqə saxlayara bilərsiniz. Düşünün ki, bir ailəni, bir gözəl qızcığazı, bir məsum insanı, bir məktəblini, bir azərbaycanlını sevindirəcəksiniz.

Ulu öndərin 31 dekabrı Dünya Azərbaycanlılarının Həmrəylik Günü elan etməsini qəbul ediriksə, əsl həmrəylik budur, 31 dekabr ərəfəsində Nəzrini və atasını sevindirin.

Biz bir media olaraq, sosial şəbəkədə qarşımıza çıxan bu kədərli məktubunu vətənpərvər, imkanlı azərbaycanlılarınm nəzərinə çatdırmaq istədik ki, informasiya dəstəyimizlə bir yardımı toxunsun.

Ümid edirik ki, siz də Nəzrinin Şaxta babaya yazdığı məktuba laqeyd qalmayacaqsınız, hər biriniz o uşağı sevindirmək üçün bir şaxta baba obrazında təşrif buyurub ailəyə kömək edəcəksiniz.

Azərbaycan prezidenti, dövlət rəhbərliyi, ürəyitəmiz məmurlar, icra başçıları, eləcə də Abşeronun icra hakimi İradə Gülməmmədova, iş adamları - Fizuli Məmmədov, Mübariz Məsimov, Araz Ağalarov, Qod Nisanov, Fərhad Əhmədov, deputatlar və onlarla şəxslər balaca Nəzrinin Qarabağ əlili olan atasının dərmanlarının xərcini öhdəsinə götürəcəyinə inanırıq.