Ağcabədi rayon sakini Afət Qələndərova redaksiyamıza gələrək, dələduzluğa məruz qalmasından, məhkəmə qərarının icra edilməməsindən şikayətlənib. Şikayətçi qeyd edib ki, 2013 və 2014-cü ildə Ağcabədi Rayon Məhkəməsinin onun xeyrinə çıxardığı qətnamələr bu günə qədər icra edilmir:

“2013-cü ilin mart ayında Səadət Mamedova ümumilikdə məndən 9000 manat borc almışdı. Aldığı borcu 10 gün müddətində qaytaracağına söz versə də, sonradan müxtəlif bəhanələr gətirərək, borcu qaytarmamışdı.

Həmçinin, həmin ilin sentyabr ayında tanıdığım Cəmilə Hüseynova Rusiyadan qızıl-zinət əşyaları gətirildiyini və həmin əşyaları almaq üçün ona 13 000 manat lazım olduğunu bildirmişdi. Bundan əvvəl verdiyim borc qaytarılmasını üçün bu məsələdə tərəddüd etmişdim. Lakin Cəmilə and içərək inandırdı ki, borcu mütləq bir ay müddətinə qaytaracaq. Hətta məndən qeyd olunan məbləğdə borc aldığı üçün qəbz də yazdı. Lakin Cəmilə də S. Mamedova kimi sonradan borcu qaytarmaq istəmədi.

Məsələni belə görüb, Ağcabədi Rayon Məhkəməsinə müraciət etdim. Məhkəmənin 2013-cü il, 23 oktyabr tarixində çıxardığı qətnaməyə əsasən, S. Mamedovadan ümumilikdə 8428 manat alınaraq mənə verilməli idi.

Həmçinin Ağcabədi Rayon Məhkəməsinin 17 iyun tarixində verdiyi qərar əsasən Cəmilə Hüseynovadan 13000 min manat və 30 manat məbləğində ödənilmiş dövlət rüsumu alınaraq mənə verilməli idi. Məhkəmənin qanuni qüvvəyə minmiş qətnamələri Ağcabədi rayon İcra Şöbəsinə göndərilib. Buna baxmayaraq hər iki qətnamənin icrası yerinə yetirilmir. Çoxsaylı müraciətlərimdən sonra Səadət Mamedov barəsində cinayət işi başlamış və o, 8 ay azadlıqdan məhrum edilib. İcra şöbəsinin rəisi Elnur Əsədov mənim şikayətlərimə baxmır. Sonda isə bildirir ki, artıq S.Mamedova azadlıqdan məhrum edilib, daha ondan borumu istəməyim.

Digər borclu Ağcabədi rayonunda orta məktəbdə müəllimə işləyir. Çoxlu sayda müraciətlərimdən sonra məhkəmə qərarının icrasını onun aldığı maaşa yönəldiblər. Belə ki, hər ay 120 manat alınaraq mənə verilməlidir. Borcumun tam ödənilməsi üçün 12 il gözləməliyəm".

Şikayətçi qeyd edir ki, hazırda yaşayış durumu çox ağırdır, üstəlik övladı ali məktəblərin birində ödənişli olaraq təhsil alır: “Aidiyyəti orqanlardan xahiş edirəm, qanuni olaraq məhkəmə qərarlarının çıxardığı qətnamənin icrası təmin olunsun, qeyd edilən pul borclarımın cavabdeh şəxslərdən alınıb mənə verilsin”.

Məsələ ilə bağlı qarşı tərəfin də rəyini öyrənməyə çalışdıq. İcra şöbəsinin rəisi Elnur Əsədov hazırda icra işinin şöbənin əməkdaşı Faiq Mustafayevdə olduğunu bildirərək, bizi ona yönləndirdi. F.Mustafayev isə qəzetimizə açıqlamasında məsələyə bu cür aydınlıq gətirdi: “Həmin iş üzrə borclu şəxs Səadət Mamedova cinayət məsuliyyətinə cəlb edilib və 8 ay azadlıqdan məhrum edilib. Digər borclu isə təhsil şöbəsində işləyir, əmək haqqı alır. Onun digər əmlakı aşkar olunmadığından borc maaşından çıxılır. Bu günə qədər onun maaşından 4 000 manata qədər borc tutularaq iddiaçıya verilib və bu proses davam etdirilir. Vətəndaş bunları təkzib edə bilər, amma bu haqda rəsmi sənədlər var”.
“Yeni Müsavat”