V çağırış Azərbaycan Respublikası Milli Məclisinin fəaliyyətə başlamasından 4 il keçir. Dörd ilin yekununda dövlətimizin ali qanunverici orqanının fəaliyyəti, ölkənin ictimai-siyasi həyatındakı rolu, parlamentdə təmsil olunan millət vəkillərinin işgüzarlığı heç şübhəsiz ki, ölkə ictimaiyyətinin xüsusi diqqətindədir. Parlamentin fəaliyyətini daima diqqət mərkəzində saxlayan Editor.az gündəlik müşahidələr və mətbuatın monitorinqi vasitəsilə onların fəaliyyətinə olan ictimai münasibəti araşdırmağa çalışır.

Araşdırmalar göstərib ki, ümumilikdə spiker Oqtay Əsədovun rəhbərliyi altında Milli Məclis kifayət qədər uğurla fəaliyyət göstərərək, respublikamızın ictimai-siyasi həyatında aktiv rol alıb. İstər ölkəmiz üçün zəruri olan qanunvericilik aktlarının hazırlanması, istərsə də dövlətçilik maraqlarının qorunması baxımından parlament və millət vəkilləri prinspial mövqe nümayiş etdiriblər.

Lakin bununla belə 4 illik dönəmdə bir sıra deputatlar yalnız fəaliyyətsizlikləri və gündəmə gəldikləri qalmaqallarla yadda qalıblar. Editor.az “Deputat kürsüsü” rubrikası çərçivəsində ayrı-ayrı millət vəkillərinin fəaliyyətinə olan ictimai rəyi təqdim edir. Bu dəfə 78 saylı Lerik seçki dairəsindən deputat İqbal Məmmədovun millət vəkili kimi fəaliyyətini araşdırmağa çalışacağıq.

İqbal Məmmədov 1965-ci ildə Lerik rayonunun Rəzgov kəndində anadan olub.

1982-ci ildə Azərbaycan Respublikası Xalq Təsərrüfatı İnstitutunun Mühasibat Uçotu və təsərrüfat fəaliyyətinin təhlili fakültəsinə qəbul olub və 1988-ci ildə təhsilini başa vurub.

Elə həmin ildə Azərbaycan neft sənayesində gənc mütəxəssis kimi əmək fəaliyyətinə başlayıb. Onun əmək fəaliyyəti Neft Daşları, Nəriman Nərimanov və Qum adası neft-qaz çıxarma idarələrində operatorluqdan rəis müavini kimi yüksək bir pilləni əhatə edir.

1996-cı ildə nəinki Azərbaycanda, bütövlükdə Xəzəryanı ölkələrdə analoqu olmayan “Kaspi-Yıldız” Azərbaycan-Türkiyə müştərək istehsal müəssisənin İdarə Heyətinin sədri seçilən İqbal Məmmədov az sonra baş direktor vəzifəsinə təyinat alıb.

Azərbaycan Respublikasının Prezidenti İlham Əliyevin Sərəncamı ilə 11 fevral 2005-ci il tarixində sahibkar kimi “Tərəqqi” medalı ilə təltif edilib.

2010-cu ilin noyabrında IV çağırış Milli Məclisə keçirilən seçkilərdə 78 saylı Lerik seçki dairəsindən millət vəkili seçilib. 2015-ci il Azərbaycan Respublikası Milli Məclis(V çağırış) seçkilərində Yeni Azərbaycan Partiyasından namizədliyi irəli sürərək, 78 saylı Lerik seçki dairəsindən millət vəkili seçilib.

78 saylı Lerik seçki dairəsindən deputat İqbal Məmmədovu parlamentin ən qalmaqallı üzvlərindən biri hesab etmək olar. Deputatın barəsində internet üzərindən apardığımız araşdırma zamanı millət vəkili ilə bağlı çoxsaylı neqativ məlumatlara rast gəlinir.

Məsələn, bu xüsusda “Report” İnformasiya Agentliyinin “Lerik sakinləri deputat İqbal Məmmədovu axtarır” sərlövhəli məqaləsi diqqət çəkir. Yazıda qeyd olunur ki, Lerik sakinləri hazırda öz deputatlarını tapa bilməməkdən şikayətlənirlər: “2010-cu ildən rayonun deputatı olan İqbal Məmmədov biz sakinlərin problemləri ilə maraqlanmır. Bu şəxsin üzünü indiyədək demək olar ki, görməmişik. İndiyədək bir dəfə də olsun seçiciləri ilə görüşməyən millət vəkili problemlərimizlə maraqlanmır, şikayətlərimizi dinləmir. Halbuki, İqbal müəllim seçkiqabağı keçirdiyi azsaylı görüşlərdə yol problemi də daxil olmaqla əksər məsələlərlə şəxsən maraqlanacağını vəd etmişdi”, – sakinlərdən biri deyib.

Agentlik yazır ki, rayon sakinlərinin verdiyi məlumata görə, “Kaspi Yıldız” və “Relax” kimi şirkətlərin sahibi olan İ.Məmmədov Lerikdə yüzlərlə hektar torpaq sahəsini öz nəzarətinə keçirərək təsərrüfat qurub.

AFN İnformasiya Portalında deputatla bağlı dərc olunan başqa bir yazıda isə onun vətəndaşı döyməsindən bəhs olunur. Yazıda qeyd olunur ki, Bakının Xətai rayonun Fəzail Bayramov 11/56 ünvanında Milli Məclisin deputatı İqbal Məmmədov qalmaqal yaradıb: “Deputat adıçəkilən ünvanda “Sahil-D” Company şirkətinin inşa etdiyi yaşayış binasına daxil olaraq orada mənzil aldığını və həmin mənzil üçün qapı gətirdiyini deyib. Lakin binanın mühafizəçisi RamazanPriyev deputata şirkətin icraçı direktoru Adil Hüseynovu gözləməyi məsləhət görüb. Mühafizəçinin bu sözündən qəzəblənən deputat ona yaxınlaşaraq, sillə ilə üzünə bir neçə dəfə vurub və təhqir edib.
Deputatın təhqirlərini və zorakılığını seyr edən Ramazan Priyev çıxış yolunu DİN-nin 102 xidmətinə zəng etməkdə görüb.
Hadisə yerinə polis əməkdaşları gələrkən, İqbal Məmmədov 10 AA 715 dövlət nömrə nişanlı “Mercedes” markalı avtomobilinə əyləşərək, oranı tərk edib”.

Millət vəkili ilə bağlı Aztoday.az informasiya portalının yaydığı xəbərdə isə onun oğlunun deputata məxsus “Relax” istirahət mərkəzində dava salaraq, iranlı turistləri döyməsindən bəhs olunur. Bu barədə hadisə şahidləri məlumat veriblər: “Onlar deyiblər ki, deputatın oğlu bayram günlərində tətil etmək məqsədilə “Relax”da olub və orada istirahət edən iki iranlı ilə dalaşıb. Mənbə bildirib ki, deputatın oğlu “butulka” ilə iranlının birinin başına zərbə endirib, digərini isə möhkəmcə döyüb. Deputat İqbal Məmmədov açıqlamasında məlumatı təkzib edib”.

Ümumiləşdirməli olsaq, deputat İqbal Məmmədovla bağlı mediada olduqca qalmaqallı xəbərlər yayılıb və ağır ittihamlar səslənib. Bir çoxu deputat tərəfindən təkzib edilməyən xəbərlərdən bəzilərini diqqətinizə təqdim edirik.

“Onu yalnız Relax-da görə bilirik, o da içkili halda’ – Hacı olan İqbal Məmmədov haqda fikirlər(Azxeber.com); “Deputat İqbal Məmmədov kəndlilərin istifadə etdiyi suya qan axıdır – ŞOK GÖRÜNTÜLƏR”(24saat.org); “Deputat donuz biznesinə girişib-ŞOK MÜRACİƏT”(aydinliq.az); “Lal deputat”: İqbal Məmmədov nə vaxt çıxış etdiyini unudub”(sfera.az); Deputat İqbal Məmmədov mühafizəçini döyüb – İDDİA(milliyol.az); Deputatın broyler fabrikində dəhşətli partlayış: Ölən və yaralananlar var(milliyol.az); Deputat mənzil fırıldağının qurbanı olub – 654 min dolları batıb(www.mediatv.az); “Deputat İqbal Məmmədov xuliqanlıq edib?-ZİYAFƏT ƏSGƏROVA ŞİKAYƏT”(tezadlar.az); “Deputat İqbal Məmmədov 1500 Lerik sakininə “Kərbəla müsibəti” yaşadır”(tendensiya.com); “Deputat İqbal Məmmədovdan enerji sabotajı: DÖVLƏTƏ NECƏ FIRILDAQ GƏLİNİR”(cumhuriyyet.az)