Qaranlıq düşəndə burada həyat dayanır. Küçədə hərəkət çətinləşir. Söhbət Tovuzun qaranlığa qərq olan küçələrindən gedir. Sakinləri narahat edən məsələ haqqında əməkdaşımızın hazırladığı materialda daha ətraflı...

Tovuzun Xəqani küçəsi 6 və 8 ünvanında yaşayan 5 mərtəbəli binanın sakinləri küçələrdə işıq dirəklərinin olmamasından narahatdır. 120 ailənin yaşadığı binaların qarşısı axşamlar zülmət qaranlıq olur. Şəhər sakinləri bildirir ki, yaranan vəziyyət oğurluq hadisələrinin baş verməsinə də səbəb olur.

Eyni problem şəhərin Zaur Axundov küçəsində də yaşanır. Bu səbəbdən ərazidə sahibsiz itlərin sayı da artıb. 5 mərtəbəli binada yaşayan 35 ailənin problemi təkcə işıq dirəklərinin yoxluğu deyil. Sakinlər mənzillərə verilən naqillərin də normal çəkilmədiyini və hər an insan həyatı üçün təhlükəli olan vəziyyətin hökm sürdüyünü deyirlər.

Məsələdən xəbərdar olan aidiyyatı qurumlar isə problemin həll ediləcəyinə söz verdilər. Rayonda gedən yenidənqurma işləri işıqsız küçələri tezliklə nura boyayacaq.

Zülmətə qərq olan küçələrə qısa zamanda işıq düşəcəyi ümidi ilə...

http://kepeztv.az