"Bu reallığı görmələri və buna görə hərəkət etmələri vacibdir."

“Avropanın təhlükəsizliyi Türkiyədən asılıdır. Türkiyənin təhlükəsizliyi üçün də Suriyanın şimalında təhlükəsiz bölgə yaradılması lazımdır”.
ANS PRESS-in hurriyet.com.tr-yə istinadən verdiyi məlumata görə, bunu bu gün hakim Ədalət və İnkişaf Partiyasının (AKP) rayon təşkilatlarının sədrlərinin toplantısında Türkiyənin baş naziri Əhməd Davudoğlu bildirib.
Brüsseldə baş verən terror aktına münasibət bildirən Əhməd Davudoğlu Avropaya sərt mesaj göndərib. "Sənin terroristin, mənim terroristim deyənlər bunun əvəzini ödəyəcəklər.Bu reallığı görmələri və buna görə hərəkət etmələri vacibdir.""
Ə. Davudoğlu deyib ki, Türkiyə hökuməti illərdir ki, Suriyanın şimalında təhlükəsiz bölgə yaradılmasının vacib olduğunu bəyan edib, Avropa bunu eşitməyib: “Biz hər şeyə rəğmən terrorla mübarizədə Avropa ilə birgə hərəkət etməkdə qərarlıyıq. Avropanın bölgədə təhlükəsizliyi qoruya bilməsi üçün Türkiyədən başqa tərəfdaşı yoxdur”.

Avropa İttifaqı və Türkiyə arasında razılaşmaya toxunan baş nazir onu da qeyd edib ki, əgər ayın 4-ə qədər Türkiyə Böyük Millət Məclisində qanunlara müvafiq dəyişikliklər qəbul edilsə, iyunun sonunda Türkiyə vətəndaşları Avropaya vizasız gedə biləcəklər.