Ermənistanda nümayişlər bazar günü səhər saatlarından davam etdiriləcək.
Bu barədə müxalif millət vəkili Nikol Paşinyan ölkə prezidenti ilə görüşündən sonra deyib.

Aprelin 21-də Paşinyan Yerəvanda keçirilən mitinqdə öz tərəfdarlarından danışıqlar aparmaq üçün icazə istəyib. Nümayişçilər ona müsbət cavab verib. Prezident Armen Sarkisyanla Respublika Meydanındakı qısa söhbətinin nəticələrini minlərlə aksiya iştirakçısı ilə bölüşən Paşinyan, danışıqlar mövzusunun yalnız baş nazirin istefası ola biləcəyini söyləyib.
"Sabah saat 11: 00-dan biz güclü aksiyalara davam edəcəyik ki, hakimiyyət dialoq barədə mövqeyimizin davamlı olduğunu görsün", -deyə Paşinyan vurğulayıb.

Qeyd edək ki, Serj Sarkisyanın baş nazir olması ilə bağlı keçirilən etiraz aksiyaları aprelin 13-dən davam edir. Etirazlara baxmayaraq, aprelin 17-də Serj Sarkisyan parlamentdə keçirilən xüsusi iclasda bu posta təyin olunub. Ölkə Konstitusiyasına edilən dəyişikliyə əsasən, Ermənistan parlament üsul idarəçiliyinə keçir və prezidentin səlahiyyətləri baş nazirə verilir.