PKK və koalisiya qüvvələrinin Kobanini ələ keçirməsindən sonra İŞİD ABŞ-ın hərbi bazası yaxınlığında yerləşən əl-Bağdadi qəsəbəsinin böyük hissəsini ələ keçirib.

Azerinfo.az Avropa.info-ya istinadən xəbər verir ki, İraqın əl-Ənbar vilayətində yerləşən əl-Bağdadi qəsəbəsinin artıq böyük bir hissəsi İŞİD-in nəzarətinə keçib.

Ərazidə İraq ordusu ilə İŞİD arasında şiddətli döyüşlər gedir. Əldə olunan məlumata görə əl-Bağdadi qəsəbəsi ABŞ üçün də strateji əhəmiyyətə sahibdir. Çünki qəsəbə ilə ABŞ ordusuna məxsus Aynəl Əsəd bazasının arasındakı məsafə 5 km-dir.

İŞİD-in qəsəbəni ələ keçirməsi koalisiya qüvvələrinin hücumlarına baxmayaraq təşkilatın hələ ki, qüvvəsini qoruyub saxladığını göstərir.

ABŞ-ın həmin hərbi bazada 320 hərbçisi var. Hərbi bazada İraq hərbçilərinə təlim keçilir.

Xatırladaq ki, ABŞ prezidenti Barak Obama İŞİD-ə qarşı İraq və Suriya xaricində də hərbi qüvvədən istifadə etmək üçün Konqresdən 3 illik səlahiyyət istəmişdi.