Bakının Sabunçu rayonunun Şuşa qəsəbəsi sakini Məhəmmədov Namiq Əhməd oğlu redaksiyamıza müraciət edərək oğluna fərdi ev tikintisi üçün rayon İcra Hakimiyyətindən icazə alarkən aldadıldığını, pulunun mənimsənildiyini bildirmişdir. Onun sözlərinə görə, bu məqsədlə müraciət etdiyi RİH mənsublarından Ömər müəllim ondan 3 (üç) min manat pul tələb etmişdir. Lakin bu qədər pul onda olmadığından, öz həmkəndlisi Zaurla məsləhətləşmiş, o da öz növbəsində qaynatası ilə məsləhətləşib bir söz deyəcəyini vəd etmişdir. Daha sonra Zaur öz qaynatası ilə məsləhətləşmiş, Namiq Məhəmmədova həmyerlisi əslən Ağdamdan olan Qabil Quliyev adlı bir Qarabağ əlilinin köməklik göstərə biləcəyini demişdir. Qabilin nömrəsini öyrənən Namiq ona zəng etmiş, Qabil ona Maştağa qəsəbəsində polilinikada olduğunu söyləmiş, ertəsi gün üçün görüş təyin etmişlər. N.Məhəmmədov bildirir: «Telefon danışığımızın ertəsi gün səhər saat 9:00-da Qabillə təyin etdiyimiz yerdə görüşdük. Qabil evə baxmaq istədi. Apardım evimizə, oturub çay içdi. Nə qədər pula gücüm çatdığını soruşdu. Mən 1500 (bir min beş yüz) manata gücüm çatdıını dedim. Gündüz saat 15:00-da pulu da götürüb bir yerdə İcra Hakimiyyətinə getdik. Orada məndən aldığı pulla Ömər müəllimin kabinetinə girdi. On beş dəqiqədən sonra çıxıb dedi ki, icazə alıb, sabahdan işə başlaya bilərəm. Mən ona inanıb ertəsi gündən ustaları dəvət etdim. İki gün keçməmiş ustalar arakəsmələri qurduqları vaxt sahə müvəkkili və Polis Bölməsinin Mehman adlı əməkdaşı gəlib tikintinin dayandırılmasını, icazə sənədinin göstərilməsini tələb ediblər. Mənə məlumat verildikdə işdəydim, sahə müvəkkilinin telefon nömrəsini aldım və evə qayıtdım. Evə çatdıqda Qabili bizdə gördüm. Oturub çay içdik, xörək yedik. Qabil mənə dedi ki, 50 (əlli) manat versəm, polisə verib məsələni həll edə bilər. Əlli manatı ona verdim, sonra da taksi tutub 5 (manat) da əlavə gediş haqqı ödəyib öz zənnimcə sahə müvəkkilinin yanına yolladım. Hara getdiyini bilmədim. Üstündən təxminən bir saat keçəndən sonra İcra Hakimiyyəti nümayəndələrindən Abbas müəllim gəlib işi dayandırmağı tələb etdi. Dedim axı mən icazə almışam. Dedi yox, o Qarabağ əlili gəlib İcra Hakimiyyətində haray-həşir salıb, işi korlayıb». N.Məhəmmədov bildirir ki, o vaxtdan nə evin tikintisini davam etdirə bilir, nə də puldan xəbər-ətər yoxdur. Qabil ondan gizlənir. Araşdırma aparırkən N.Məhəmmədovun yerlisi Zaurun qaynatası ilə əlaqə saxlayıb təfərrüatları dəqiqləşdirməyə çalışdıq. Öyrəndik ki, həmin şəxs həmkarımız jurnalist İbrahim Qubadoğludur. O, yeznəsinin xahişi ilə Namiqə köməklik etmək istəyib, lakin müəyyən səbəblərdən edə bilməyib. O vaxtadək Qarabağ əlili kimi tanıdığı Qabili ona isnad verib ki, veteran nüfuzundan istifadə edib köməklik göstərə bilər. Çünki bildiyi qədərilə, Sabunçu rayon rəhbərliyi şəhid ailələrinə, müharibə əlillərinə hörmət edir, müraciətlərinə həssas yanaşır. İbrahim müəllim Namiqin dediklərini qismən təsdiqlədi və bildirdi ki, Qabilin aldığı pulu tam həcmdə vəzifəli şəxsə çatdırıb-çatdırmadığına əmin deyil. Bildirdi ki, Qabili düz adam hesab edirmiş. Lakin N.Məhəmmədovu aldatdıqdan sonra o da Qabilin yaşadığı ünvana gedib, evdə tapmadığına, zənglərə cavab vermədiyinə görə zənnində yanıldığını bilib. Araşdırıb, öyrənib ki, Qabilin Qarabağ müharibəsi əlili olması şübhəlidir. Üstəgəl, o, dələduzluqla bərabər tutulan əməllər törədib, hətta əvvəlllər narkotik üstündə məsuliyyətə də cəlb olunub. «Deryaz.az» saytı olaraq, biz də öz növbəmizdə araşdırma apararaq öyrəndik ki, Qabil Bilgəhdə qonşuluqda yaşadığı «Qocalar Evi» kimi tanınan Müharibə və Əmək Əlilləri üçün pansionatın direktoru Qətibə Əsədovanın dəfələrlə maddi köməkliyindən faydalansa da, daha artığına nail olmaq üçün müəssisə rəhbəri barədə kütləvi informasiya vasitələrinə böhtan xarakterli yalan məlumatlar ötürürmüş. Onu tanıyanlardan ünsiyyətdə olduğumuz bəzi şəxslər bildirdilər ki, Qabil Qarabağ əlili adı ilə sui-istifadə edərək, eyni yolla Əmək və Əhalinin Sosial Müdafiəsi Nazirliyinin başqa analoji müəssisələrinin rəhbərlərini də təngə gətirib, nazirlərin qəbul qrafikini izləyərək, onlarla görüşüb, ehtiyacdan gileylənir, maddi yardım almağa nail olur. Həmçinin bildirdilər ki, Qabil işi keçsin, sözü ötsün deyə, sinəsində ölkə başçısının, vitse-prezidentin və başqa nüfuzlu dövlət xadimlərinin şəkillərini gəzdirərək görüşdüyü vəzifəli şəxslərin «gözünə soxur»
Qabil tərəfindən aldadılmış, etibarından sui-istifadə edilmiş şəxslər ondan hüquq-mühafizə orqanlarına şikayət edəcəklərini bildiriblər. Yəqin bu yolla onun Sabunçu RİH-lə əlaqələrinin təfərrüatları da üzə çıxar.
Mövzunu davam etdirəcəyik