Bərdənin mərkəzində yaşayan gənc Qoşqarın ailəsi çətin vəziyyətdədir. O, üç yaşına qədər sağlam idi. Amma sonra bir qulağı eşitmə qabiliyyətini itirib, nitqində problemlər yaranıb.

Qoşqar normal cümlə qura, sərbəst danışa bilmir. Ona uşaqlığında maddi imkansızlıqdan köməklik göstərilməyib.

Ailəsi Sensasiya TV-yə deyib ki, əgər vaxtında tədbir görülsəydi, tez sağalardı. Evin tək uşağı olan Qoşqarla bağlı həkimlər bildiriblər ki, müalicəsi mümkündür.

Ancaq onun atası fəhlə, anası xadimə işləyir. Ailənin aylıq gəliri heç 300 manat eləmir. Onlar bu pulla uşaqlarının dilinin açılmasın, qulağının eşitməsinə necə təmin eləsinlər?

Qoşqarın anasının arzusudur ki, oğlu eşitsin, danışsın, hamı kimi hiss eləsin, fikir bildirsin. Onun sözlərinə görə, övladının toyunu görmək istəyir:

“Mənim tək balam var.

Bu dünyada Allahdan ən böyük duam, arzum Qoşqarın dil açması, eşitməsidir. Amma bizim valideyn kimi buna maddi gücümüz çatmır.

Xalqımızdan, dövlətimizdən, prezidentimizdən, Mehriban xanımdan xahiş edirəm ki, bizə köməklik eləsinlər, səsimizə səs versinlər”.

Qoşqarın ailəsi dövlət başçısı və Azərbaycanın imkanlı, xeyriyyəçi insanlarından yardım gözləyir:

“Biz bu vətənin övladlarıyıq. Qoşqar sabahın əsgəri, vətəndaşıdır. Mən də övladımı başqalarının uşaqları kimi görmək həsrətindəyəm. Yalvarıram, əziz xalqım, bizə dəstək olun...”