“Avropa İttifaqı Ərdoğana yalvarır”

Bu sözləri Macarıstan respublikasının baş naziri Viktor Orban Almaniyanın "Bild" qəzetinə müsahibəsində deyib.

Baş nazirin sözlərinə görə, Türkiyə prezidenti Rəcəb Tayyib Ərdoğanla uzun müddətdir ki, yaxın dostluq münasibəti var. "Bizim Türkiyə ilə münasibətlərimiz möhkəm və qarşılıqlı güvən prinsiplərinə əsaslanır. Lakin bundan asılı olmayaraq mən Avropa İttifaqının türklərin yanında dilənçi formasına düşdüyü fikrindəyəm. Pul və verilən vədlər qarşılığında özümüzün qoruya bilmədiyimiz sərhədlərimiz üçün boyun əyib Ərdoğana yalvarırıq. Lakin bu, çox düzgün siyasət ola bilməz. Bu siyasət Avropanın gələcəyini və təhlükəsizliyini Türkiyənin istəyindən asılı bir hala gətirir”, - deyə nazir bildirib.

Həmçinin Orban onu da əlvə edib ki, Brüssel Türkiyəyə yerinə yetirə bilməyəcəyi, ya da yetirmək istəmədiyi sözlər verir. Türkiyədən 100 minlərlə miqrantı alaraq Avropa Birliyi ölkələri arasında paylamaq planının boş bir xəyaldan ibarət olduğunu söyləyən nazir ”mən bu plana səs versəm, məni Budapeştdə işıq dirəyindən assınlar”, - deyə vurğulayıb. "Heç bir AB ölkəsi bunu etməyəcək".