CƏBHƏ BÖLGƏSİNİ DİQQƏT MƏRKƏZİNDƏ SAXLAYAN EKOLOGİYA NAZİRİ SABUNÇU RAYONUNA NƏZARƏT ETMİR
Bu gün - 22 aprel Beynəlxalq Yer Günüdür. Bununla əlaqədar təsdioq olunmuş plana uyğun olaraq Ekologiya və Təbii Sərvətlər Nazirliyi müxtəlif tədbirlər keçirmiş, ətraf mühitin mühafizəsi sahəsində ictimaiyyət arasında təbliğat işləri aparmışdır.Tədbirlər həm də görkəmli akademik Həsən Əliyevin 110 illik yubileyi ərəfəsinə təsadüf etdiyindən keçirilən görüşlərdə dünya şöhrətli alimin qələminin məhsulu olan çoxsaylı əsərlərdə təbiətşünaslıq elminə verdiyi mühüm töhfələrdən, müəllifi olduğu "Həyəcan təbili", "Təbiətin keşiyində" kitablarının bu günümüz üçün də aktual olmasından söz açılıb.
Bildiyimiz kimi, akademik Həsən Əliyevin qardaşı, Ümummilli lider Heydər Əliyev də təbiətin böyük qayğıkeşi idi. Ulu Öndərimiz dediyi bu sözlər ETSN-nin rəsmi saytında şüar kimi sərgilənir: "İnsan təbiətdən öyrənir, onun havası ilə pərvəriş tapır, ağıla dolur, zənginləşir, təzələnir, təmizlənir". Ekologiya məsələlərini dam diqqət mərkəzində saxlayan Prezident İlham Əliyev keçən ay ETSN-nin Əsasnaməsində mütərəqqi dəyişikliklər edilməsi ilə bağlı Fərman imzalamışdır.Nəzərdə tutulan dəyişikliklərdə Əsnamənin əvvəlki variantında bəzi maddələrdə və yarımbəndlərdə yer alan "atmosfer havasının", "meşələrin" sözlərindən sonra "və yaşıllıqların" sözünün əlavə olunması, eləcə də yaşıllıqların uçotu, kadastrı və monitorinqi haqqında məlumatların toplanılmasının və həmin məlumatların Nazirliyin rəsmi internet səhifəsində yerləşdirilməsi tapşırılmışdır.
Amma yazıqlar olsun ki, Sabunçu rayonunun icra başçısı kimi mühüm dövlət qulluqçusu vəzifəsi daşıyan Adil Vəliyev nə ağıla dolmaq, nə zənginləşmək, nə təzələnmək, nə də təmizlənmək istəyir. Onun rayonda yaşıllığa qənim kəsilməsi, ağacların kök üstündən qoparılaraq yerinin qanunsuz satılmasına rəvac verməsi bu məntiqi doğurur.
Redaksiyamıza daxil olmuş səhih məlumata görə, paytaxtın Sabunçu rayonunun Bakıxanov qəsəbəsinin Habil Balakişiyev küçəsində hektardan artıq yaşıllıq ərazi hasarlanaraq yüzlərlə çoxillik ağaclar kök üstündən kəsilmiş, onların yeri hamarlanaraq sotlara bölünüb satılmaqdadır. Həm də açıq-aşkar surətdə. Adil Vəliyevin maklerləri satışa çıxardıqları ərazilərdə öz telefon nömrələrini gözəçarpan yerdə asmaqdan belə çəkinmirlər. Rayonda özbaşınalıq o həddə çatıb ki, qəsəbələrdə qəbiristanlıq yerləri belə ucdantutma fərdi ev tikmək istəyənlərə satılmaqdadır. İnsanların həyat təhlükəsizliyi gözlənilmədən, infrastruktur nəzərə alınmadan yüksək gərginlikli elektrik xətlərinin altındakı, iri diametrli su və qaz kəmərlərinin üstündəki ərazilər də satılmaqdadır.
Maraqlıdır ki, hörmətli nazir Hüseynqulu Bağırov düşmənlə üzbəüz cəbhə bölgəsində vətəndaşlarla görüşlər keçirib müraciətlərini dinləyir, orada ətraf mühitin və ekoloji tarazlığın mühafizəsi ilə qayğılana bilir, amma paytaxtda, Nazirliyin necə deyərlər, "burnunun ucunda" Adil Vəliyevin apardığı "yaşıl genosid"i görmür. Atəşkəsi tez-tez pozan təcavüzkar ermənidən qorxmayan cənab nazir icra başçısını qınamaqdan belə ehtiyatlanır.Edilən bütün şikayətlərə, yazılan və səslənən bütün tənqidlərə baxmayaraq, Sabunçuda baş verən ekoloji vandalizm nəzarətə götürülmür, təqsirkarlara qarşı heç bir təsirli tədbir görülmür