Hesablama Palatasının hesabatında Bakı və Sumqayıt şəhər icra hakimiyyətlərinin fəaliyyətindən də bəhs olunub.

Sənəddə qeyd olunur ki, Bakı Şəhər Icra Hakimiyyəti Mənzil-Kommunal Təsərrüfatı Departamentinə dövlət büdcəsinin “Mənzil və kommunal təsərrüfatı” bölməsindən, dövlət büdcəsinin dövlət əsaslı vəsait qoyuluşundan və büdcənin ehtiyat fondlarından Bakının yenidənqurma, abadlıq işlərinə ayrılan vəsaitlərin proqnozlaşdırılması və istifadəsinə dair audit keçirilib.
Audit zamanı bir sıra nöqsanlara yol verildiyi müəyyən edilib. Departament tərəfindən mənzil fondunun zərərinin ödənilməsinə ayrılan vəsaitlərin proqnozlaşdırılması zamanı təsiredici amillərin, cari ilin sonuna gözlənilən xərclərin nəzərə alınmadığı üzə çıxıb. Həmçinin bəlli olub ki, anbarda olan material resursları qalığının nəzərə alınmaması, xidmət sahəsi işçilərinin ixtisas dərəcələri və əməkhaqları qanunvericiliyə uyğun müəyyənləşdirilməyib. Mənzil fondunun gəlirləri hesablanan zaman orada müvəqqəti məskunlaşmış məcburi köçkün əhalinin sayı nəzərə alınmayıb. Debitor borcunun yığılması və ləğv edilməsi, gəlirlərin artırılması, xərclərin və zərərin azaldılması istiqamətində müvafiq tədbirlərin görülməməsi nəticəsində zərər məbləğinin ödənilməsinə yönəldilən büdcə vəsaitinin məbləği əhəmiyyətli dərəcədə artırılıb. Satınalmalarda birbaşa müqavilələr bağlanarkən ehtimal olunan qiymətin müəyyənləşdirilməməsi mənzil fondu üzrə ayrılmış vəsaitin səmərəli xərclənməməsi ilə şərtlənib. Xidmət haqqına hesablanmış əlavə dəyər vergisinin xərcə salınması nəticəsində mənzil fondunun xərcləri artırılıb və bəzi hallarda əlavə dəyər vergisi az hesablanıb.
Sumqayıt Şəhər Icra Hakimiyyəti Memarlıq və Şəhərsalma Idarəsinin maliyyə-təsərrüfat əməliyyatlarının qanunvericilik aktlarına uyğunluğunun auditi zamanı isə müəyyən edilib ki, idarənin hüquqi statusunda bəzi uyğunsuzluqlar mövcud olub. Sumqayıt şəhərinin mövcud baş planının 1978-ci ildə təsdiq edilməsinə baxmayraaq audit aparılan tarixədək yeni baş planı hazırlanaraq təsdiq edilməyib. Memarlıq, tikinti işləriylə bağlı icra başçısı tərəfindən verilmiş sərəncamların idarəyə daxil olmasının, iş və xidmətlərə görə vətəndaşlardan, hüquqi şəxslərdən daxil olan ərizə-müraciətlərin uçotu aparılmayıb. Idarənin xərclər smetası müvafiq qaydada təsdiq edilməyib, işçilərin əməkhaqlarına edilmiş əlavələr əsaslandırılmayıb.
Audit nəticəsində büdcəyə nə qədər pul qaytarılıb?
Hesabatda bəzi rayon icra hakimiyyətlərinin auiditin nəticəsi üzrə görülən işlərdə bəhs olunub. Sənəddə qeyd olunur ki, Masallı Rayon Icra Hakimiyyəti tərəfindən auditin nəticəsi üzrə görülən işlər barədə Hesablama Palatasına daxil olan məlumatda nəticələrə dair müzakirənin aparıldığı, avans ödənişləri zamanı işlər və xidmətlər üzrə satınalma müqaviləsinin nümunəsinin tələblərə riayət edilməsi və podratçılara ödənilən avansın istifadə olunmasını əsaslandıran sənədlərin alınmasının təmin edilməsi istiqamətində tədbirlərin görüldüyü, 4 obyekt üzrə yerinə yetirilməmiş 97311,6 manat tikinti işinin yerinə yetirilməsi, 5 obyekt üzrə 16390,0 manat dəyərində inventar və avadanlıqların müvafiq podratçılar tərəfindən quraşdırıldığı, nöqsanlara yol vermiş 2 nəfərin işdən azad edildiyi qeyd olunub.
Neftçala Rayon Icra Hakimiyyəti tərəfindən auditin nəticəsi üzrə görülən işlər barədə Hesablama Palatasına daxil olan məlumatda isə işlərin həcminin artırılması nəticəsində podratçıya artıq ödənilmiş 21211,73 manat məbləğində vəsaitin dövlət büdcəsinə bərpa edilməsi, 2 obyekt üzrə yerinə yetirilməmiş 67458,71 manat məbləğində tikinti işinin yerinə yetirilməsi, 2 obyekt üzrə 49117,5 manat dəyərində inventar və avadanlıqların müvafiq podratçılar tərəfindən quraşdırıldığı, işində nöqsanlara yol verən 2 orta məktəb direktoruna töhmət verildiyi, baş mühasib və 1 aparıcı məsləhətçiyə xəbərdarlıq olunduğu qeyd edilib.
Hacıqabul Rayon Icra Hakimiyyəti tərəfindən aparılan auditin nəticəsi üzrə görülən işlər barədə Hesablama Palatasına daxil olan məlumatda 7 obyekt üzrə yerinə yetirilməmiş 65527,1 manat məbləğində tikinti işinin yerinə yetirilməsi, 4 obyekt üzrə 3604,9 manat dəyərində inventar və avadanlıqların müvafiq podratçılar tərəfindən quraşdırıldığı, 1 obyekt üzrə işin vahidinin qiymətin artırılması nəticəsində artıq ödənilmiş 2407,76 manat vəsaitin həmin podratçıya olan kreditor borcdan azaldılması, işində nöqsanlara yol verən baş mühasibə xəbərdarlıq olunub.
Gədəbəy RIH tərəfindən aparılan auditin nəticəsi kimi 1 obyekt üzrə 1660,0 manat dəyərində inventar və avadanlıqların müvafiq podratçılar tərəfindən quraşdırıldığı, 3 obyekt üzrə yerinə yetirilməmiş 77182,4 manat məbləğində tikinti işinin yerinə yetirilməsi və keyfiyyətsiz yerinə yetirilmiş 49592,3 manat dəyərində işin yenidən işlənməsi, işində nöqsanlara yol verən böyük məsləhətçiyə xəbərdarlıq olunub.
Şirvan Şəhər Icra Hakimiyyəti tərəfindən aparılan auditin nəticəsi üzrə görülən işlər barədə Hesablama Palatasına daxil olan məlumatda 1 obyekt üzrə yerinə yetirilməmiş 30160,8 manat məbləğində tikinti işinin yerinə yetirilməsi, 5 obyekt üzrə yerinə yetirilməmiş 17164,2 manat məbləğində tikinti işinin dəyərinin dövlət büdcəsinə bərpası, obyektlərin istismara qəbul olunduğu və ilkin dəyəri müəyyən edilməklə müvafiq qaydada uçota alındığı bildirilib.
Zərdab Rayon Icra Hakimiyyətinin auditi üzrə məlumatda bildirilib ki, 4 obyekt üzrə yerinə yetirilməmiş 29734,9 manat məbləğində tikinti işinin dəyərinin dövlət büdcəsinə bərpası və 2 obyekt üzrə 8085,0 manat dəyərində inventar və avadanlığın müvafiq podratçılar tərəfindən quraşdırıldığı bildirilib.