Göyçayda vətəndaşa məxsus avtomobilin alışması yaşayış evinin də yanmasına səbəb olub. Bakı, Ağdaş və Sabirabadda da yanğın hadisələri qeydə alınıb.

Göyçay rayonunda yanğın hadisəsi baş verib. Hadisə Qaraxıdır kəndində qeydə alınıb. Kənd sakini Əliyar Abdullayevə məxsus ikimərtəbəli, 6 otaqlı evdə baş verən yanğının söndürülməsi üçün əraziyə FHN-in Göyçay Dövlət Yanğından Mühafizə Hissəsinin iki yanğınsöndürən maşını və canlı qüvvəsi cəlb olunub. Ümumi sahəsi 480 kvadratmetr olan evin 56 kvadratmetrlik hissəsi yanıb, qalan hissəsi yanğınsöndürənlər tərəfindən alovdan mühafizə edilib. Hadisə zamanı mənzilin birinci mərtəbəsində dayanmış, ev sahibinə məxsus “VAZ 2106” markalı minik avtomobili də yanaraq yararsız hala düşüb. Məlumata görə, yanğın zamanı ailə üzvləri evdə olmayıblar. Hadisə barədə yanğından mühafizə hissəsinə qonşular məlumat veriblər. İlkin ehtimala görə, evin alt hissəsindəki minik avtomobili qısaqapanma nəticəsində yanıb və alov tədricən evə keçib.

Ağdaş rayonunun Ərəb kəndində vətəndaşa məxsus ümumi sahəsi 320 kv. m olan ikimərtəbəli, 6 otaqlı evin 2-ci mərtəbəsində mətbəxin tavanı və dam örtüyünün yanar konstruksiyaları 16 kv.m sahədə yanıb. Evin qalan hissəsi alovdan mühafizə olunub.

Sabirabad rayonunda da yaşayış evi yanıb. Hadisə rayonun Zəngənə kəndində qeydə alınıb. Vətəndaşa məxsus ümumi sahəsi 204 kv.m olan birmərtəbəli, 4 otaq və aynabənddən ibarət evin 2 otağının yanar konstruksiyaları 60 kv.m sahədə və dam örtüyü 80 kv.m sahədə yanıb. Hadisə yerinə FHN-nin DYMH-nin texnikası və canlı qüvvəsi cəlb olunub. Onların müdaxiləsi nəticəsində alovu ram etmək mümkün olub və evin qalan hissəsi yanğından mühafizə edilib.

Paytaxtda isə avtomobil yanıb. Hadisə Sabunçu rayonunda qeydə alınıb. Vətəndaşa məxsus "Mercedes" markalı minik avtomobilinin mühərrik hissəsi alışıb. Hadisə yerinə cəlb olunan yanğınsöndürənlər tərəfindən avtomobilin qalan hissəsi alovdan mühafizə olunub. İlkin ehtimala görə, yanğına avtomobilin mühərrikində baş verən qısaqapanma səbəb olub.

kepeztv.az