Kəpəz TV (Region TV) xəbər verir ki, Şəmkirdə baş verən partlayışın təfərrüatı bəlli olub.
Elnur Mehdiyev – ev sahibi: “Yoldaşım qazı açanda partlayış olub. Uçub ev, vəziyyət də belədir. Yoldaşım yüngül xəsarət alıb. Üzü, qolu, bir də saçı yanıb. Oğlumun da saçı yanıb”.
Xanım Məmmədova – qonşu: “İşə gedən getmişdi, getməyən də evdə idi. Bir də gördük, gurultu gəldi – partlayış oldu. Çölə çıxdıq ki, bura bu vəziyyətdədir”.

———

Kəpəz TV (Region TV) xəbər verir ki, bu gün təxminən saat 07:50 radələrində Şəmkir rayonu, Kür qəsəbəsindəki yaşayış binasında partlayış baş verib. Partlayış 5-mərtəbəli binanın birinci mərtəbəsində, 34 yaşlı Elnur Elat oğlu Mehdiyevə məxsus, mənzil 32 ünvanında qeydə alınıb. İlkin ehtimala görə, qaz sızması nəticəsində baş verən yanğın zamanı ev sahibinin həyat yoldaşı, 21 yaşlı Günay Süleyman qızı Mehdiyeva xəsarət alıb. Yaralı Şəmkir Mərkəzi Rayon Xəstəxanasının travmatologiya şöbəsinə yerləşdirilib. Həkimlər qadının vəziyyətinin orta-ağır olduğunu bildirirlər. Şəmkir Dövlət Yanğından Mühafizə Hissəsindən verilən məlumata görə, hadisə zamanı partlayışın qeydə alındığı mənzillə yanaşı, qonşuluqda yerləşən 31, 33 və 36 saylı mənzillərin ara divarlarına, qapı və pəncərələrinə də ziyan dəyib. Fakt araşdırılır.