Ağcabədi rayonunda 17 yaşlı qızın intihar etməsinin səbəbləri ilə bağlı ilkin ehtimallar bəlli olub. Özünü asan Şahsevən kənd sakini 1999-cu il təvəllüdlü Ülkər Ələmdar qızı Quliyevanın əmisi Əfqan Quliyev ANS PRESS-ə açıqlama verərək bildirdi ki, qardaşı qızının özünü asması gözlənilməz olub.

“Qardaşım qızı ilə sonuncu dəfə onu dərsdən çıxanda gördüm. O, evə getməyib. Dərs vaxtının bitməsinə baxmayaraq Ülkərin evə gəlmədiyini görən valideynləri narahat olublar və məktəbə gediblər. Məktəbin qapısının bağlı, dərslərin qurtardığını gördükdə isə onu axtarmağa başlayıblar. Sonda onun pay torpaq sahəsində asılmış meyitini tapıblar. Qardaşımın qızı evə yox, dərsdən çıxıb məhz həmin torpaq sahəsinə gedib və orada canına qıyıb”.

Ə. Quliyev Ülkərin intiharına ehtimal kimi, onun sınaq imtahanından az bal toplamasının ola biləcəyini deyir: “Mərhum 4 il idi ki, ali məktəbə hazırlaşırdı. Son sınaq imtahanında təxminən 350 bal toplamışdı və bu, onu narahat edirdi. Buna görə, narahat olurdu. Ola bilər ki, Ülkər məhz buna görə özünü öldürüb. Oxuduğu məktəblə də maraqlanmışıq. Heç bir problem olmadığını dedilər”.

Bildirilib ki, Ülkər Quliyeva iki qardaşın tək bacısı olub.

***

Günün ikinci intiharı Ağcabədi rayonunda qeydə alınıb. Rayon Prokurorluğundan ANS PRESS-ə verilən məlumata görə, Şahsevən kənd sakini 1999-cu il təvəllüdlü Ülkər Ələmdar qızı Quliyeva özünü yaşadığı evin həyətyanı sahəsində ağacdan asaraq intihar edib. Onu asılmış vəziyyətdə ailə üzvləri aşkar ediblər.

Mərhumun hansı səbəbdən canına qəsd etdiyi hələlik məlum deyil. Kənd məktəbinin 11-ci sinif şagirdi olan Ülkər ali məktəbə hazırlaşırmış.

Faktla bağlı Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi açılıb, hadisənin səbəbləri araşdırılır.

İki həftə əvvəl də Sabirabad rayonunda 11-ci sinif şagirdi intihar edib. Rayonun Qalağayın kənd sakini, 1999-cu il təvəllüdlü Hacıxanım Mustafa qızı Mehdizadə özünü yaşadığı evin həyətindəki yardımçı tikilidən asıb. 17 yaşlı qızın valideynləri hüquq-mühafizə orqanlarına hadisəyə səbəb kimi Hacıxanımın sınaq imtahanında istədiyi balı toplamadığını, buna görə intihar etdiyini bildiriblər. Mərhumun əlaqə saxladığımız qohumları da bildirdilər ki, H. Mehdizadə kənd məktəbinin 11-ci sinif şagirdi idi və universitetə hazırlaşırdı: "Bir neçə gün əvvəl ilk sınaq imtahanına girdi və cavablar məlum olarkən aşağı bal yığdığını öyrəndi. Buna görə çox məyus oldu. Düşünürük ki, intiharının səbəbi də məhz budur. Çünki onun başqa problemi yox idi", - deyə qohumları bildirmişdilər.