O, eyni problemə görə hələ 20 gün öncədən intihara cəhd etmişdi.

“Koroğlu” metrosu ətrafında yaşanan gərginlik eyni adlı körpüdən 34 yaşlı Zamiq İbrahimovun özünü atmağa cəhd etməsi səbəbindən yaranıb.

Azerinfo.az xəbər verir ki, ANS TV-nin məlumatına görə, bir neçə saat yarıçılpaq vəziyyətdə Koroğlu körpüsünün üzərində dayanaraq canına qəsd edəcəyini deyən Zamiq Fövqəladə Hallar Nazirliyinin xüsusi xilasetmə qrupunun onunla danışıqlarından sonra fikrindən daşındı.

Özünü atmağa cəhd edən Zamiq İbrahimov xüsusi kran vasitəsilə körpüdən aşağı endirildi.

Avtomobil vasitəsilə dərhal ərazidən uzaqlaşdırılan Zamiqin anasından onun intihara cəhd etməsinin səbəbini öyrənə bildik.

Ananın dediyinə görə, Zamiqin intihara cəhd etməsinin səbəbi onun digər oğlunun polis işçisi tərəfindən öldürülməsi və cinayət işinin düzgün araşdırılmamasıdır.

34 yaşlı Zamiq İbrahimov eyni problemə görə hələ 20 gün öncədən Koroğlu körpüsünə çıxaraq intihara cəhd etmişdi. Səbəbini isə belə əsaslandırmışdı ki, bir müddət əvvəl yol qəzasından həlak olan qardaşının cinayət işi hüquq-mühafizə orqanları tərəfindən düzgün araşdırılmır.

Bu isə ümumilikdə birinci belə hadisə deyil. İl ərzində bir neçə nəfər “Koroğlu” körpüsünün üzərinə çıxaraq intihara cəhd edib. Onlar bəlkə də bunu bir təhdid üsulu seçərək problemlərinin həll ediləcəyini düşünüblər. Amma qəbul edilmiş qərara əsasən bu cür təhdid vasitəsinə əl atanlar inzibati qaydada cəzalandırılacaq. Həm də gəlin, unutmayaq ki, Koroğlu tarixə adını igid kimi yazdırıb, indi onun adını daşıyan körpüyə çıxaraq zəiflik nümayiş etdirmək igidlikdən deyil.