Bakı Ağır Cinayətlər Məhkəməsində hədə-qorxu ilə pul tələb edən qəzet redaktorunun məhkəməsi başlayıb.
“İrəvan Press” qəzetinin baş redaktoru, cinayət məcəlləsinin 182.2.4-cü maddsəi ilə təqsirli bilinən Azər Arif oğlu Abbasovun məhkəmə prosesinə hakim Zeynal Ağayev sədrlik edəcək.

Qeyd edək ki, cinayət işində 26 nəfər zərərçəkmiş qismində tanınıb.

Xatırladaq ki, “İrəvan Press” qəzetinin baş redaktoru Azər Abbasov ötən ilin iyun ayında hədə-qorxu yolu ilə tələb etmədə ittiham olunaraq həbs edilib.
Bakı və regionlardan daxil olmuş ərizələrə əsasən və Dövlət Təhlükəsizliyi Xidmətində (DTX) aparılan araşdırmalar nəticəsində “İrəvan Press” qəzetinin və informasiya saytının baş redaktoru Abbasov Azər Arif oğlu xidmətə dəvət olunaraq hədə-qorxu yolu ilə tələb etmə cinayət əməlində ittiham olunaraq saxlanılıb, barəsində Səbail rayon məhkəməsi tərəfindən həbs qətimkan tədbiri seçilib.

A.Abbasovun “reket jurnalistika” ilə məşğul olması barədə daha öncə də mediada məlumatlar yayımlanmışdı. Etibarlı mənbədən alınmış məlumata görə, A.Abbasovun həbsi DTX-də “reket jurnalistika”ya qarşı aparılan əməliyyat-istintaq tədbirlərinin davamıdır.

Qeyd edək ki, “İrəvan Press” qəzeti və saytı Azərbaycan Nəşriyyatında yerləşir və orada zəruri istintaq tədbirləri keçirilib.