“Çınqıl mafiyası”nın məhv etdiyi Göyçay çayının məcrası bərpa olunmasa, gələcəkdə daha böyük fəlakətlər qaçılmazdır
İyunun 2-də Göyçay rayonunda Göyçay çayı üzərindəki uçan körpünün bərpası başa çatıb. Artıq təmir-bərpa işləri aparılmış hissədə asfalt örtüyü vurulur. İyunun 22-də körpünün istifadəyə veriləcəyi gözlənilir.

Nəzərə çatdıraq ki, Göyçayda gediş-gəlişi təmin edən yeganə körpünün uçmasının səbəbi uzun illər ərazində Göyçay çayının məcrasının daş-çınqıl karxanaları tərəfindən kortəbii şəkildə məhv edilməsi olub. Belə ki, son 15 ildə çayın yatağının 10-dan çox şirkət tərəfindən barbarcasına, normadan 20-30 dəfədən də artıq daşınıb aparılmasına, eyni zamanda çaya yeni çınqıl-qum gəlməsinin qarşısı bəndlə kəsildiyinə görə rayon ərazisində Göyçay çayının məcrası 3-7 metrdən 20-22, bəzi yerlərdə 35-40 metrə qədər dərinləşib. Bu səbəbdən çayın yatağı körpü olan hissədə də məhv olub, burada dərinlik 5-6 metrdən 18-20 metrədək artıb. Nəticədə çayda su yaz-yay aylarının spesifikasına uyğun şəkildə artan zaman körpünün yuyulma nəticəsində çöldə qalan istinad laylarını da uçurdu. Beləliklə, orada öncə piyada körpüsü tamamilə, ardınca isə avtomobil körpüsünün bir hissəsi uçub dağıldı.












Faktiki olaraq sabiq nazir Ziya Məmmədova, rayonun keçmiş icra başçıları Mübariz Ağayevə, Ərziman Əliyevə və digər şəxslərə bağlı olan, habelə ATF şirkətinin daş-çınqıl karxanalarının qanunsuz, kortəbii fəaliyyəti nəticəsində rayon təsərrüfatına, dövlətə milyonlarla manat ziyan dəyib.\











Uzunluğu 76 metr, eni 11,5 metr olan avtomobil körpüsünün 30 metrlik hissəsi dağılmış, nəticədə Bakı-Şamaxı-Yevlax avtomobil yolunda nəqliyyatın hərəkəti dayanmış, Göyçay çayının şərq hissəsindəki 38 kəndin rayon mərkəzi ilə əlaqəsi kəsilmişdi. İyunun 3-dən başlayaraq Azərbaycan Avtomobil Yolları Dövlət Agentliyinin və “Körpübinatikinti” ASC-nin tikinti briqadası və ağır texnikaları körpünün bərpası işlərinə başlayıb. Əvvəlcə çayda suyun axın istiqaməti dəyişdirilib, yəni suyun kənardan mərkəzə yönəldilərək məcrasının əvvəlki vəziyyətə qaytarılması üçün tədbirlər görülüb.

Sonra körpünün dağılmış yerində dəmir borular basdırılıb, uzunluğu 36 metr, eni 1 metr, hündürlüyü 5-9 metr olan beton istinad divarı qurulub. Hazırda ərazidə torpaqbərkitmə işləri görülür. Torpaq qatı çay yatağından təxminən 15 metr hündürlüyü olan körpüyədək qaldırılıb. Bu günədək əraziyə təxminən 20 min kubmetr torpaq tökülərək tarazlıq və bərkitmə işləri görülüb. Körpünün bərpası işlərinə 30-dan çox ağır texnika və 50-ə yaxın işçi qüvvəsi cəlb olunub. Tikinti işləri gündüz və gecə saatlarında davam etdirilir. İnşaat işlərinin 22 iyunda başa çatdırılması və körpünün istifadəyə verilməsi nəzərdə tutulur.











Qeyd edək ki, körpünün dağılması səbəbindən iyunun 2-dən bəri sürücülər Göyçay-Ucar-Göyçay (Bərgüşad yolu) avtomobil yolundan istifadə etməklə rayon mərkəzinə gedib-gəlirlər.

Xüsusi olaraq vurğulayaq ki, Göyçayda körpünün uçması ilə bağlı vəziyyəti ilk andan prezident İlham Əliyev nəzarətə götürüb. Prezidentin ciddi tapşırığından sonra körpünün 20 gün müddətinə istismara verilməsi üçün maksimum tədbirlər görülüb və qısa zamanda körpünün təmir-bərpa edilərək istfadəyə verilməsi mümkün olub.













Qeyd edək ki, “çınqıl mafiyası”nın qanunsuz fəaliyyəti ilə bağlı xeyli illər öncə müvafiq qurumlara rayon sakinləri tərəfindən şikayətlər edilib. 2014-cü ildə isə icra hakimiyyəti çayda təhlükəli vəziyyət yarandığı üçün daş-çınqıl karxanalarının fəaliyyətini yasaqlayan qərar verib. Ancaq şirkətlər buna məhəl qoymayaraq çay yatağını məhv etməkdə davam ediblər. Nəticədə gözlənilən fəlakət baş verib. Baş verən hadisə ilə bağlı cinayət işi açılıb, ekspertiza rəylərində Göyçay çayının məcrasının qanunsuz şəkildə talanması təsdiqini tapıb və 10-dək çınqıl karxanası sahibi həbs edilib. Rayon sakinləri bildirir ki, şirkətlərlə yanaşı sabiq nazir Ziya Məmmədov da məsuliyyətə cəlb edilməlidir, faktiki olaraq, rayondakı çayın məcrasını dağıdan iki böyük şirkət də birbaşa Z.Məmmədova aid olan ZQAN Holdinqə aiddir.

Ekspertlər bildirir ki, körpü istifadəyə verildikdən sonra təcili qaydada Göyçay çayının məcrasının əvvəlki vəziyyətinə qaytarılması üçün ciddi tədbirlər görülməlidir. Əgər çayın yatağı qalxmazsa, qarşıdakı aylarda, illərdə daha böyük fəlakətlər qaçılmaz olacaq.