Narkotik alverçiləri olan 4 nəfərdən ibarət dəstə üzvləri cəzalarının azaldılması məqsədi ilə Ali Məhkəməyə müraciət ediblər.
Cinayət Məcəlləsinin 206.3.2, 234.4.1 və 234.4.3-cü maddələri ilə təqsirləndirilən 29 yaşlı Mingəçevir şəhər sakini Hüseynova Afaq Nazim qızı, 29 yaşlı Cəlilabad rayon sakini Əkbərov Nəsimi Vaqif oğlu, 34 yaşlı Cəlilabad rayon sakini Naxıyev Toğrul Bəybala oğlu və 25 yaşlı Cəlilabad rayon sakini Əliyev Sübhan İntiqam oğlunun məhkəmə prosesinə hakim İmran Hacıqayıbov sədrlik edəcək.

İttiham aktına görə, Naxıyev Toğrul Bəybala oğlu və Əliyev Sübhan İntiqam oğlu İrandan narkotik vasitə almaq məqsədi ilə lazım olan məbləğdə pulu Nəsimi Əkbərov və Afaq Hüseynova veriblər. Onlar isə 2015-ci il 18 sentyabr tarixində İran İslam Respublikasına keçərək istintaqa məlum olmayan yerdə və mənbədən külli miqdarda hesab edilən narkotik vasitə 2 ədəd bağlamada təmiz çəkisi 218 qram olan heroini və 8 qram tiryəki əldə ediblər.
Sonra isə Afaq Hüseynova heroin olan həmin bağlamalardan birini və tiryək olan bağlamanı anus dəliyinə, 2-ci heroin olan bağlamanı isə cinsiyyət orqanına yerləşdirərək 19 sentyabr tarixində Astara gömrük məntəqəsindən Azərbaycan Respublikasının ərazisinə keçirmişlər. Ancaq burada hər iki şəxs həbs edilərək istintaq orqanına təhvil veriliblər. 21 iyun 2016-cı ildə Lənkəran Ağır Cinayətlər Məhkəməsinin hökmü ilə Afaq Hüseyova 8 (səkkiz) il 6 (altı) ay, Əkbərov Nəsimi Vaqif oğlu 10 (on) il, Naxıyev Toğrul Bəybala oğlu 10 (on) il və Əliyev İntiqam Sübhan oğlu 10 (on) il müddətinə azadlıqdan məhrum ediliblər.

Şirvan Apellyasiya Məhkəməsi isə Afaq Hüseynovanın cəzasını 7 ilə, digərlərinin cəzasını isə 8 ilə endirib.