Gəlin gətirməyə gedirdilər, ancaq qismət olmadı... Ağstafada yaşanan hadisədə iki nəfər xəsarət aldı. Şəmkir və Tovuzda baş verən qəzalar da xəsarətlə nəticələnib. Gəncədə isə 5 avtomobilin iştirakı ilə zəncirvari qəza baş verib.

Ağstafada gəlin maşını qəzaya düşüb. Hadisə Bakı-Qazax magistralının rayonun Qırılı kəndi ərazisindən keçən hissəsində qeydə alınıb. Qazaxın Şıxlı kəndindən Gədəbəy rayonuna gəlin gətirməyə gedən "Hyndai" markalı avtomobil "Naz-Lifan" markalı minik maşını ilə toqquşub. Zərbənin gücündən hər iki avtomobil magistraldan çıxaraq yol kənarına aşıb. Hadisə zamanı bəy xəsarət almasa da, sürücü - 54 yaşlı Dursun Əhmədov və onun 23 yaşlı qızı Aytəkin Əhmədova müxtəlif bədən xəsarətləri ilə Ağstafa Mərkəzi Rayon Xəstəxanasına çatdırılıb. Qeyd edək ki, həmin ərazidə bir həftə öncə də toya gedən avtomobil qəzaya düşmüşdü.

Şəmkir rayonunun Seyidlər kəndində isə “VAZ-21015” markalı avtomobil aşıb, kənd sakinləri 51 yaşlı İntizar Xəlilov və 44 yaşlı Nazim İmanov müxtəlif xəsarətlərlə Şəmkir Mərkəzi Rayon Xəstəxanasının Travmatologiya şöbəsinə yerləşdiriliblər.

Gəncədə isə zəncirvari yol qəzası baş verib. Şah İsmayıl Xətai prospektində 5 avtomobilin toqquşması ilə nəticələnən yol-nəqliyyat hadisəsi baş verib. Şəhər sakini 43 yaşlı Əzimxan Tahirov idarə etdiyi "Opel Astra" markalı avtomobillə hərəkətdə olarkən onu ötüb keçmək istəyən "Chevrolet Niva" markalı avtomobillə toqquşub. Daha sonra "Chevrolet Niva" yolun kənarında dəyanan 3 müxtəlif maşına dəyib. Nəticədə avtomobillərlə yanaşı, iki nəfər yüngül bədən xəsarətləri alıb. Qəzadan sonra "Chevrolet Niva” markalı avtomobilin sürcüsü hadisə yerindən qaçıb. Həmin sürücünün Kəlbəcər rayon Polis Şöbəsinin əməkdaşı olduğu bildirilir. Onun hansı səbəbdən hadisə yerini tərk etdiyi məlum deyil. Hadisə ilə əlaqədər qəza baş verən ərazidə avtomobillərin hərəkətində müəyən çətinliklər yaranıb. Hərəkətin təhlükəsizliyini təmin etmək üçün hadisə yerinə əlavə polis heyəti çağırılıb.

Tovuzun Heydər Əliyev prospektində qeydə alınan hadisədə sürücülərdən biri yüngül xəsarət alıb, avtomobillərə isə ciddi ziyan dəyib. Hadisə şahidlərin sözlərinə görə, qəzaya yüksək sürət səbəb olub. Nəticədə "Mercedes" və "İnfiniti" toqquşub. Qəza rayon avtovağzalının yaxınlığında baş verdiyindən həmin ərazidə bir müddət avtomobillərin hərəkətində tıxac yaranıb. Hadisə yerinə çağırılan təcili tibbi yardım briqadası "Mercedes"in sürücüsü Azər Qasımova ilkin yardım göstərib.

Bütün faktlarla bağlı araşdırmalara başlanılıb.

http://kepeztv.az