İmişlidə toy şənliyindən çıxıb evə gedən gənclər qəzaya düşüb. Hadisə zamanı 2 nəfər dünyasını dəyişib, 4 nəfər xəsarət alıb. Bakıda da yol nəqliyyat hadisə baş verib. “Mercedes”le “İnfiniti” markalı avtomobillərin toqquşması iki nəfərin xəsarət alması ilə nəticələnib. Bənzər hadisə Gəncə şəhərində də yaşanıb.

Hacıqabul-Horadiz yolunun 98-ci km-də, İmişli rayonu Xubyarlı kəndi ərazisində yol qəzası qeydə alınıb. İmişli rayon Aranlı kənd sakini Həsən Hüseynovun idarə etdiyi “VAZ 21 011” markalı avtomobil qarşı tərəfdən gələn Qeyrət Muradovun sükan arxasında olduğu “Mersedes”lə toqquşub. Qəza zamanı “VAZ 21 011”- də olan sərnişin 32 yaşlı Əlizamin Abayev hadisə yerində dünyasını dəyişib. Müxtəlif dərəcəli xəsarət alan hər iki avtomobilin sürücüsü və “VAZ 21 011”-dəki sərnişinlər Sahil İbayev və Elnur Babaşov, “Mercedesin” sərnişini olan Qızılkənd kənd sakini Göyçək Bayramova İmişli Rayon Mərkəzi Xəstəxanasına yerləşdirilib. Ağır bədən xəsarəti alan “VAZ 21011” in sürücüsü Həsən Hüseynovun həyatını xilas etmək mümkün olmayıb.

Bakının Qaradağ rayonu ərazisində də yol-nəqliyyat hadisəsi baş verib. “Mercedes” markalı avtomobil Meyvəli bazarının yaxınlığında geriyə dönmə əməliyyatı edən zaman qarşıdan gələn nəqliyyat vasitəsini gözləməyib. Nəticədə öz yolu ilə hərəkətdə olan “İnfiniti” markalı avtomobil “Mercedes”ə çırpılıb. “Mercedes”də olan iki nəfər - Camal Rəhimov və Pərviz Babalı xəsarət alıb, avtomobildə olan meyvə- tərəvəz məhsulları isə yola dağılıb.

Gəncədə baş verən yol qəzasında iki nəfər yaralanıb. Hadisə şəhərin Şah İsmayıl Xətai prospektində baş verib. Gəncə şəhər sakinləri 22 yaşlı Araz Dursunov və 24 yaşlı Zöhrab Musayev “Mercedes” markalı avtomobili yolun kənarında təmir edərkən əks istiqamətdə hərəkət edən “VAZ 21011” markalı avtomobilin sürücüsü qəfildən dönmə əməliyyatı edib və onları vurub. Yaralılar Gəncə şəhər TTYX-nın travmotologiya şöbəsinə yerləşdirilib. Vəziyyətləri kafidir.

Hər üç faktla bağlı araşdırma aparılır

http://kepeztv.az/