Ukraynada oxuyan 20 yaşlı gənc yeni aldığı "Mercedes"i beton səddə çırpıb.

Ukraynada Azərbaycanın yüksək vəzifəli məmurunun oğlu qəzaya düşüb. Qəza bir nəfərin ölümü ilə nəticələnib.

ANS PRESS-in məlumatına görə, hadisə Kiyev şəhərinin Borispol prospektində baş verib.

Ukrayna mətbuatının məlumatına görə, Ukraynada təhsil alan 20 yaşlı Araz Məmmədovun idarə etdiyi “Mercedes” markalı maşın yoldan çıxaraq beton səddə çırpılıb və aşıb. Daha sonra maşın alışmağa başlayıb. Avtomobildə A. Məmmədovdan başqa bir qız da olub.
Hadisə şahidlərinin sözlərinə görə, avtomobili idarə edən gənc yolda qəza şəraiti yaradıb və sürət həddini aşıb. Bu səbəbdən sürücü idarəetməni itirib.

Qəzanı görənlər maşında olan sərnişinləri avtomobildən çıxara biliblər. Lakin qız yerindəcə keçinib. Oğlanı isə reanimasiya şöbəsində yerləşdiriblər.
ANS PRESS-in qafqazinfo.az-a istinadla verdiyi məlumata görə, qəzaya uğrayan gənc “Aztelekom” İstehsalat Birliyinin direktoru Məmməd Məmmədovun oğlu olub. Onun yanında olan qız isə xalası qızı olub. A.Məmmədov "Mercedes" markalı maşını yenicə almışdı.
Artıq Araz Məmmədovun valideynləri və yaxınları Ukraynaya yola düşüblər.