Ölkə ərazisində yenə yol qəzaları baş verib. Hacıqabulda 1-i uşaq olmaqla, 3 nəfər ölüb, Şəmkirdə sürücü dünyasını dəyişib, Bakıda isə 2 nəfər xəsarət alıb.

Hacıqabul rayonu ərazisində dəhşətli yol-nəqliyyat hadisəsi baş verib. Qəzada biri körpə olmaqla, üç nəfər ölüb, 1 nəfərsə yaralanıb. Hadisə Bakı-Qazax yolunun 145-ci kilometrliyində, rayonun Qarasu kəndi ərazisində qeydə alınıb. Sabirabad rayonu, Qəzli kənd sakini, 60 yaşlı Rafiq Mustafayevin idarə etdiyi “VAZ-2107” markalı avtomobillə Yevlax rayon sakini, 37 yaşlı Natiq Sarıyevin idarə etdiyi “KamAZ” markalı avtomobil toqquşub. Nəticədə “VAZ-2107”-in sürücüsü və avtomobildə olan 48 yaşlı Mehralı Əliyevlə 1 yaşlı Nurid Əliyev dünyasını dəyişib. 40 yaşlı Dilarə Əliyeva isə ağır xəsarətlərlə xəstəxanaya yerləşdirilib. İlkin ehtimala görə, qəzaya dumanlı hava şəraiti səbəb olub.

Şəmkir rayonu ərazisində isə bir nəfərin ölümü, iki nəfərin ağır bədən xəsərətləri alması ilə nəticilənən yol-nəqliyyat hadisəsi baş verib. Yol qəzası rayonun Sabirkənd kəndində qeydə alınıb. “KamAz” markalı yük maşını “VAZ21011”in yoluna çıxıb və nəticədə nəqliyyat vasitələri toqquşub. “Jiquli”də olan 56 yaşlı Rafiq Nağıyev hadisə yerində ölüb, avtomobildə olan həmkəndliləri 48 yaşlı İxtiyar Cəlilov və 43 yaşlı Sevinc Nağıyeva ağır bədən xəsarətləri ilə Şəmkir Mərkəzi Rayon Xəstəxanasına yerləşdiriliblər.

Paytaxtın Suraxanı rayonunda da 2 nəfərin xəsarət alması ilə nəticələnən yol qəzası baş verib. Hadisə Qaraçuxur qəsəbəsi Etibar Bəkirov küçəsində qeydə alınıb. 30 yaşlı Sergey Panovun idarə etdiyi “VAZ 2104” markalı minik maşını sərt döngədə 104 saylı xətt üzrə hərəkət edən sərnişin avtobusu ilə toqquşub. Qəza nəticəsində “Jiquli”nin sürücü ilə yanaşı, avtobusda olan 45 yaşlı Natavan Ağayeva xəsarət alıb. Hər iki yaralı xəstəxanaya aparılıb. Vəziyyəti ağır olan “VAZ”ın sürücüsü travmatologiya şöbəsinə yerləşdirilib, qadın isə tibbi yardımdan sonra evə buraxılıb. İlkin ehtimala görə, hadisəyə “Jiquli”nin sürücüsünün sürət həddini aşması və avtomobili sərxoş halda idarə etməsi səbəb olub. Faktla bağlı Baş Dövlət Yol Polisi İdarəsinin İstintaq və Təhqiqat İdarəsində araşdırmalara başlanılıb.

http://kepeztv.az