İsmayıllıda ana və azyaşlı övladı dəm qazından dünyasını dəyişib. Bərdədə isə zəhərlənən 12 yaşlı qızın müalicəsi davam etdirilir.

İsmayıllıda bir ailənin iki üzvü bədbəxt hadisə nəticəsində dünyasını dəyişib. Talıstan kənd sakini 37 yaşlı Yeganə Qasımlı oğlu 5 yaşlı Fəridi yaşadığı evin hamam otağında çimizdirərəkən, hər iksi dəm qazından zəhərlənərək ölüb. İlkin məlumata görə, hamamda quraşdırılan su qızdırıcısı kustar üsulla hazırlanıb. Ana və övladının meyiti Respublika Məhkəmə Tibbi Ekspertiza və Pataloji Anatomiya Birliyinin İsmayıllı rayon şöbəsində müayinə edilib. Ekspertizanın rəyindən sonra ölümün dəqiq səbəbi bilinəcək. Faktla bağlı İsmayıllı Rayon Prokurorluğu tərəfindən araşdırma aparılır.

Bərdədə isə 12 yaşlı qız dəm qazından zəhərlənib. Hadisə rayonun İmamqulubəyli kəndində qeydə alınıb. Valideynləri Leyla Vəliyevanın vanna otağından gec çıxdığını görüb qapını sındırıblar. Bu zaman qızlarını huşsuz vəziyyətdə görüblər və dərhal təcili tibbi yardıma müraciət ediblər. Leyla Vəliyeva huşsuz halda Bərdə Mərkəzi Rayon Xəstəxanasına çatdırılıb. Reanimasiya şöbəsinə yerləşdirilən xəstəyə tibbi yardım göstərilib. Faktla bağlı araşdırma aparılır.

http://kepeztv.az