Gəncədə sərnişin avtobusu qəza törədib. Sərnişinlərdən biri xəsarət alıb.

Hadisə bu gün səhər saatlarında şəhərin Zülfü Hacıyev küçəsində qeydə alınıb. “Hyundai” markalı sərnişin avtobusu 6 saylı marşrut xətti üzrə hərəkət edərkən əks istiqamətdən gələn avtomobil onun yoluna çıxıb. Nəticədə avtobus sürücüsü idarəetməni itirib və nəqliyyat vasitəsi yol kənarında dayanan “Mercedes” markalı minik avtomobilinə çırpılıb. Minik avtomobili isə həyət evlərindən birinə dəyib. Qəza nəticəsində avtobusda olan şərnişinlərdən biri, 36 yaşlı Sevinc Əliyeva xəsarət alıb. Yaralı dərhal Gəncə şəhər Təcili Tibbi Yardım Xəstəxanasına aparılıb.

Məharət Kərimov- travmatoloq: “Təxminən yarım saat öncə təcili yardım stansiyası həkiminin müşayiəti ilə avtoqəza nəticəsində xəsarət alan 1 nəfər- Əliyeva Sevinc- gətirilmişdir. Xəstəyə lazımi travmatoloji yardım olunub. Hal-hazırda stasionar nəzarətdədir”.

Gəncə Şəhər Baş Polis İdarəsi və Dövlət Yol Polisi İdarəsi əməkdaşları hadisə yerinə baxış keçiriblər. Faktla bağlı araşdırmalar davam edir.

http://kepeztv.az