Bakıda piyadanın ölümü ilə nəticələnən yol qəzası baş verib. Salyanda isə iki avtomobil toqquşub. Hadisə zamanı 3 nəfər xəsarət alıb. İmişlidə də xəsarətlə nəticələn yol qəzası qeydə alınıb.

Bakıda piyadanın ölümü ilə nəticələnən yol qəzası baş verib. Hadisə paytaxtın Nərimanov rayonunda qeydə alınıb. Abşeron rayon sakini Məhərrəm Əliyev idarə etdiyi “Niva” markalı avtomobillə yolu keçən Cəlilabad rayon sakini Mirfazil Bağırovu vurub. Nəticədə piyada hadisə yerindəcə keçinib. İlkin məlumata əsasən qəzaya yüksək surət səbəb olub.

Ələt-Astara magistral yolunun Salyanın Quyçu kəndi ərazisindən keçən hissəsində də yol qəzası qeydə alınıb. Salyanın Sarvan kənd sakini, 53 yaşlı Xudayar Əzimovun idarə etdiyi "Qazel" markalı yük maşını hərəkətdə olarkən əks istiqamətdən gələn "Mitsubishi" markalı avtomobillə toqquşub. Nəticədə "Qazel"in sürücüsü və minik avtomobilində olan Şirvan şəhər sakinləri - 55 yaşlı Xudat Ağamalıyev, 52 yaşlı Qeys Quliyev müxtəlif dərəcəli bədən xəsarətləri alıb. Yaralılar Salyan Mərkəzi Rayon Xəstəxanasına çatdırılıb.

İmişli rayonunda baş verən qəzada isə iki nəfər xəsarət alıb. Hadisə rayonun Ətrafyol deyilən ərazisində qeydə alınıb. Beyləqan rayon sakini, 29 yaşlı Elnur Rəsulov idarə etdiyi "Prado" markalı avtomobillə hərəkətdə olarkən anidən idarəetməni itirib, maşın yolun kənarına aşıb. Hadisə nəticəsində sürücü və avtomobilin salonunda olan həmyerlisi, 29 yaşlı Elşad Sadıxanov müxtəlif dərəcəli ağır bədən xəsarətləri alıblar. Yaralılar İmişli Rayon Mərkəzi Xəstəxanasına çatdırılıb.

Baş verən faktlarla əlaqədar araşdırmalar davam edir.

http://kepeztv.az