Yüksək sürət, bu səbəbdən idarəetməni itirmə, ani diqqətsizlik və ya məsuliyyətsizlik. Bütün bunlar ölkə ərazisinə yenə də yol qəzalarına və ağır nəticələrə yol açıb. Ölənlər və yaralananlar var.

Bakının Sabunçu rayonu, Bakıxanov qəsəbəsi ərazisində yol qəzası qeydə alınıb. Şəhər sakini 61 yaşlı Niyazi Quliyev idarə etdiyi 60 saylı xətt üzrə hərəkət edən “Daewoo” markalı avtobusla yolu keçən Abşeron rayon sakini 33 yaşlı İlkin Məmmədovu vurub. Piyada aldığı xəsarətlərdən hadisə yerində ölüb.
Yasamal rayonunda isə 1 nəfərin xəsarət alması ilə nəticələnən yol-nəqliyyat hadisəsi baş verib. Qəza Mirzə Abbas Şərifzadə küçəsində qeydə alınıb. 20 yanvar dairəsi istiqamətində hərəkətdə olan “Wolksvagen” markalı avtomobillə “BYD” markalı maşın toqquşub. Zərbənin gücündən “Wolksvagen” yol kənarındakı səkinin üstünə çıxıb.
“BYD”də olan sərnişin müxtəlif dərəcəli bədən xəsarətləri alıb. Yaralı təcili tibbi yardım avtomobili ilə xəstəxanaya aparılıb.
Tərtər rayonunda da ağır yol qəzası qeydə alınıb. Hadisə rayonun Sarıcalı kəndində baş verib. Nofəl Qurbanovun idarə etdiyi “Mercedes”lə Tehran Hüseynovun idarə etdiyi “VAZ-21099” toqquşub. Nəticədə hər iki avtomobildə olan 3 sərnişin xəsarət alıb. Yaralılardan Rəfiqə Qurbanovanın həyatını xilas etmək mümkün olmayıb. İlkin ehtimala görə, qəzaya yüksək sürət və avtomobillərin bir-birinin yoluna çıxması səbəb olub.
Yevlax rayonunda Mehman Əsədov idarə etdiyi “VAZ-2106” markalı avtomobillə yolu keçən həmyerlisi Niyaməddin Əhmədovu və onun qızı Dənizi vurub. Niyaməddin Əhmədov hadisə yerində keçinib. Dəniz isə müxtəlif bədən xəsarətləri ilə xəstəxanaya yerləşdirilib. İlkin ehtimala görə, qəzaya sürücünün yüksək sürət səbəbindən avtomobildə idarəetməni itirməsi səbəb olub. Bütün faktlarla bağlı araşdırmalar aparılır.

http://kepeztv.az