Təlim-məşq toplanışını Antalyada davam etdirən "Qəbələ"nin yarımmüdafiəçisi Rəşad Sadiqov apasport.az saytına müsahibəsi

- Komandaya adaptasiya olmusunuzmu?

- "Qəbələ"yə uyğunlaşmağın çətin keçmədi. Çünki komandada olan yerli futbolçularla yaxşı münasibətimiz var. Legionerlərə qarşı da aqressiv olmamışıq. Onlarla rəqib kimi görüşəndə də münasibətimizi qorumuşuq. Bu da uyğunlaşmağıma kömək etdi.

- "Xəzər Lənkəran"da oyununuz niyə alınmadı?

- Oyunumuz alınırdı, sadəcə, qol vura bilmirdik. Buna görə pis oldum. Altı ay ərzində rəqib qapısına yol tapa bilmədim. Təbii ki, qələbə olmayanda, qol vurulmayanda nəticə uğursuz hesab edilir və bu də gözə tez çarpır.

- "Qəbələ"nin avrokuboklara çıxmaq şansını necə dəyərləndirirsiniz? Şansınız varmı?

- Çempionatın yarısı hələ oynanılmayıb. Nəzərə alsaq ki, əsas rəqiblərimizdən 6 xal geri qalırıq, bu niyə də mümkün olmasın. Çünki onların hamısı ilə hələ iki dəfə görüşəcəyik. Yaxşı heyət yığılıb. Biz də çalışacağıq ki, ilk "3-lük"də yer alaq və avrokuboklara yollanaq. Klub rəhbərliyinin yaratdığı şəraitin qarşılığını vermək lazımdı.

- Baş məşqçi də yenidir. Üstəlik transferlər də davam edir. Yeni gələnlər komandanı gücləndiribmi?

- Gələnlərin hamısı özlərini sübut etmiş futbolçulardı. Bura elə-belə oyunçu götürməzlər.

- Yayda "Xəzər Lənkəran"da bu cür etmişdi. Millinin futbolçuları ilə güclənsə də, nəticə qənaətbəxş olmadı.

- Orda bəzi səbəblər oldu, bunu özləri bilirlər. Qarışmaq istəmirəm. Çempionatda pis təsir bağışlamırdı. Yalnız Zaqataladakı "Simurq"la oyun istisna olmaqla, qalanları ilə başabaş mübarizə apardıq. "Sumqayıt"la öz meydanımızdakı, AZAL-la səfərdəki oyunlarda rəqibin cəmi bir şansı oldu, onda da qol vurdular. Bu cür oyunlarımız çox oldu. Bu da komandada özünəinamı itirdi.

- Artıq 32 yaşınız var. Yüksək səviyyədə çıxış etmək baxımından "Qəbələ"ni özünüz üçün sonuncu şans sayırsınız?

- Ola bilər. Mən də karyeramı "Qəbələ"də bitirmək istəyirəm. Gücümün tükəndiyini hiss edən zaman, futbolla vidalaşacam.

- Yığmanın baş məşqçisi dəyişdi. Bu dəyişiklikdən sonra milliyə dəvət ediləcəyinizi gözləyirsinizmi?

- Gözləyirəm. Yenə deyirəm, millidə gəncləşdirmə prosesi süni addımdı. Yığmada güclü futbolçular oynamalıdı. Dünyanın hər yerində belədi. Kim güclüdürsə, layiqdirsə, oynamalıdı.

- Eddi İsrafilov da yığmada oynamağa razılıq verib. Onu bu qərarına münasibətin necədi?

- İspaniya Primerosunda oynayan futbolçu yığmamıza xeyir verməyə bilməz.

- Onu azərbaycanlı kimi qəbul edirsiniz?

- Mən də eşitdim ki, əvvəl oynamaq üçün pul istəyib. Belə bir şey varsa, mən də istəməzdim oynasın. Belə edibsə, deməli, azərbaycanlı deyil. Əgər heç bir məbləğ qarşılığı güdmədən yığmaya gəlirsə, xoş gəlir.