Uzun illər "Kəpəz"də xidmət edən tanınmış mütəxəssis ömrünün yarıdan çoxunu ölkə futbolunun inkişafına həsr edib. Və yenə də futbolun içində, sevimli işinin başındadır.

Mehman Allahverdiyev məşqçi kimi müstəqillik dönəmində Gəncə komandasının əldə etdiyi bütün uğurlarının müəllifidir. Onun məşqçiliyi dövründə "Kəpəz" 3 dəfə Azərbaycan çempionatının qızıl medallarını qazanıb, 4 dəfə ölkə kubokunun qalibi olub. Əslində hamı onu yaxşı tanıyır və o, təqdimata ehtiyacı olmayan futbol adamlarındandır.
Mehman Allahverdiyev - Yubilyar:"Doğrudan da, bu 55 il bir göz qırpımında gəlib keçib. Bu günə kimi də şükür ki, 55 yaşım olduğunu hiss etmirəm. Elə-bil dünən futbol oynayırdım. Bəlkə də, bu onunla əlaqədardır ki, idmanla məşğul olmuşuq".
Təcrübəli mütəxəssis futbola Gəncədə dahi məşqçi Konstantin Abramenkonun yanında başlayıb. İstedadı və həmyaşıdlarından seçilməsi onun şəhərin ustalardan ibarət komandasına yolunu açıb, "Neftçi"də oynayıb. Dövrünün sayılıb-seçilən hücumçulardan olub.
Seçdiyi yolda "Kəpəz"in prezidentinin qazandığı və qazandırdıqları daha çox olub. Azarkeşlərə uğurlardan dolayı sevinc bəxş edən məşqçi bu illər ərzində həm maddi, həm də mənəvi cəhətdən irəli düşüb.
Oynadığı dövrlər Mehman Allahverdiyev karyerasında unudulmaz izlər qoyub. Onun futbol kolleksiyasında hələ də xatırladığı oyunlar və qollar var.
Ötən əsrin 90-cı illərinin əvvəlində oyunçu karyerasını başa vuraraq məşqçiliyə başlayan Allahverdiyev özünü yeni ampluada sınamağa qərar verib. Və seçimi onun doğru istiqamətdə olduğunu ortaya qoyub. Uğur uğuru gətirib.
Mehman müəllim ötən günlərin arzusu ilə yaşayır. Doğma "Kəpəz"ini yenidən zirvədə görmək eşqi ilə alışıb-yanır.
"Kəpəz"in bütün titullarının memarı ad günü ilə bağlı yubiley tədbiri keçirmək niyyətində deyil. Gəncədə ilk peşəkar klubun yaradılmasından 55 il ötsə də bu tarixi hadisəni təmtəraqla qeyd edə bilməyən klub rəhbəri özünü sevimli komandasından seçmir.

Sonda əlavə edək ki, Azərbaycan futbolunun inkişafında göstərdiyi xidmətlərə görə Mehman Allahverdiyev 2013-cü ildə əməkdar məşqçi fəxri adına layiq görülüb.

kepeztv.az