Gəncənin Kəpəz klubu 45 günlük fasilədən sonra II dövrənin hazırlıqlarına başlayıb

Futbol üzrə Azərbaycan I Divizionunda çıxış edən Gəncənin "Kəpəz" klubu 45 günlük fasilədən sonra II dövrənin hazırlıqlarına start verib. Qərb təmsilçisi məşqlərə 19 futbolçu ilə başlayıb.

Çempionatın ilk yarısında arzuladığı nəticələrə çata bilməyən sarı-göylər itirilən xalları sığortalamaq üçün fasilə müddətindən səmərəli istifadə etməlidilər. Amma müəyyən çətinliklər vəziyyəti mürəkkəbləşdirib. Gəncə şəhər stadionunun ot örtüyünün yaxşı vəziyyətə olmaması səbəbindən komanda məşqlərini mini-meydanda keçmək məcburiyyətində qalıb.
Vidadi Rzayev- "Kəpəz"in baş məşqçisi: "Şəraitdən çox şey asılıdır. Özünüz də görürsünüz ki, biz hansı şəraitdə məşq keçirik. Əlimizdən gələni edirik ki, Kəpəzi ilk altılığa daşıyaq".
Gəncə klubu I Dövrənin yekunlaşmasının ardından 5 futbolçu ilə yollarını ayırıb. Bunlar qapıçı Davud Kərimi, müdafiəçilər Kamran İsmayılov, Sərxan Allahverdiyev, Sərxan Müslümov və hücumçu Həsən Allahyarovdur. Düşərgəyə yeni futbolçular da qoşulub. Onlar baxışa gəlib.
Azər Həşimov- "Kəpəz"in kapitanı: "Birinci dövrəyə nəzər salanda biz bəzi oyunlarda əsas vaxta artırılan əlavə dəqiqələrdə qapımızdan qol buraxdıq. Bu barədə uşaqlarla da danışdıq ki, daha da məsluliyyətli olmalıyıq. Komandaya yeni futbolçular cəlb olunub. İkinci dövrədə daha yaxşı oyun nümayiş etdirərək lazım olan nəticəni əldə etməyə çalışacağıq".
"Kəpəz" təlim-məşq toplanışının son hissəsini Nizami yurdundan kənarda keçirmək niyyətindədir. Bu Gürcüstan və ya Bakı ola bilər.

Kəpəz ikinci dövrənin ilk oyunu fevralın 21-də keçirəcək. Gəncəlilərin rəqibi Bakının Lokomotiv komandası olacaq.

kepeztv.az