Yarışda gəncəli idmançılar da mükafatlar uğrunda gücünü ortaya qoyub. Şağan Olimpiya İdman Kompleksində baş tutan ölkə birincilyinə Nizami yurdunun samboçuları baş məşqçi Ceyhun Bayramovun rəhbərliyi ilə yollanıb. Respublikanın müxtəlif şəhər və rayonlarından 200-ə yaxın idmançının qatıldığı və ölkənin ən güclülərinin müəyyənləşdiyi yarışda Gəncə 9 çəki dərəcəsində 20 idmançıyla təmsil olunub. Bu samboçulardan 3-ü komanda yoldaşlarından fərqlənə bilib. 87 kq-da güləşən Dərya Quliyev yarışın baş mükafatına sahib çıxmaqla doğma şəhərə qızıl medalla dönüb.
Ceyhun Bayramovun yetirmələrindən mükafatçılar sırasına düşən digər idmançılar ikinci yerə layiq görülüb. 82 kq çəkidə Röyal Zeynalov və 100 kq+ Elturan Əliyev yalnız finalda büdrəməklə gümüş medala yiyələnib.
Ötən illə müqayisədə builki nəticələrin zəif olduğunu deyən şəhər yığmasının baş məşqçisi çempionluq gözlədiyi bəzi idmançıların ümidi doğrultmadığını dilə gətirib.
Ceyhun Bayramov- məşqçi: "Ötən ilə nisbətən builki nəticəmiz zəif oldu. Keçən il biz 5 qızıl medal qazanmışdıq. Bu il daha iki idmançımızdan yaxşı çıxış gözləyirdik. Ancaq onlar zədəli olduğundan bu yarışa qatıla bilmədilər".
Nəzərinizə çatdıraq ki, gənclərin ölkə birinciliyində fəxri kürsüdə yer alan gəncəli samboçular qarşıdakı günlərdə yığmanın tərkibində təlim-məşq toplanışına qoşulacaq. Aprel ayında Serbiyada reallaşacaq Avropa birinciliyində iştirak edəcək idmançılar Şağan Olimpiya Idman Kompleksində hazırlıq keçəcək.

kepeztv.az