Azərbaycanın şose velosipedi üzrə Elit yığması və "Synergy Baku" kontinental komandasının üzvü Maksim Averin Xorvatiyada keçirilən Beynəlxalq Velosipedçilər İttifaqının (UCİ) 1.2 kateqoriyalı birgünlük "Umag Trophy" yürüşündə uğurla çıxış edib.
Azerinfo.az-ın Trend-ə istinadən yaydığı məlumata görə, o, 161 km məsafəni 3 saat, 25 dəqiqə, 16 saniyəyə başa vuraraq 2-ci yeri tutub. Yağışlı hava şəraitində baş tutan yürüşün son 20 km-i xüsusilə çətin alınıb. Belə ki, ardıcıl toqquşmalar bir neçə velosipedçinin yarışı yarımçıq dayandırması ilə nəticələnib. Xoşbəxtlikdən Maksim bütün bu toqquşmalardan qaça bilib və finişi 10 nəfərdən ibarət pelotunun işərisində keçib. Fotofinişə əsasən, velosipedçimiz yekun sıralanmada 2-ci olub.

Bu isə M.Averinə Rio-2016 Yay Olimpiya Oyunları üçün aktivinə daha 30 reytinq xalı yazmağa imkan verib. Xatırladaq ki, idmançımız martın 1-də Xorvatiyada təşkil olunmuş digər yarış - "İzola" Qran-Prisində 5-ci olmaqla 10 xal qazanmışdı.