"Dünən şəhərin mərkəzində təbliğat aksiyaları keçirdik. "İnter"lə oyunda bunun bəhrəsini gördük". Futbolxeber.az-ın məlumatına görə, bu sözləri "Neftçi"nin Müşahidə Şurasının üzvü Bəhram Bağırzadə deyib.

Bağırzadə gələcəkdə oyunların həftə sonunda keçirilməsi üçün çalışacaqlarını qeyd edib: "Bugünki oyunda azarkeşlərin sayı çox olmaya bilər. Yəqin ki, bu, hava şəraiti ilə bağlıdı. Digər səbəbi isə oyunun bazar ertəsinə düşməsidi. Çalışacağıq ki, gələcək oyunlarımız şənbə və bazar günlərinə düşsün. Bura gələn 2 əsas yol var ki, onlar da bağlı idi. Biz özümüz stadiona 2 saata gəlib çatmışıq. Bu cür çətinliklər var. Əgər "Neftçi" yayda avrokuboka qatılsa, azarkeşlər mütləq gələcək. Bu sahədə işlər gedir, hamısını indi açıqlaya bilmərəm. Bunu etsəm, digər klublar da dediklərimdən faydalana bilərlər. Yenə müxtəlif aksiyalar keçirəcəyik. Həm 8-ci km, həm də ətraf yerlərdə işlər gedir".