Azərbaycan millisinin baş məşqçisi Serbiya milli komandası ilə yoldaşlıq oyunundan sonra mətbuata açıqlama verib

"Hesab edirəm ki, yaxşı sınaq oyunu oldu. Birinci hissədə daha yaxşı oynadıq. Hesabı bərabərləşdirə bildik. Amma Serbiya millisinin üzvlərinin əksəriyyətinin Avropanın aparıcı klublarında çıxış etməsi nəticəyə təsirini göstərdi".

ANS PRESS-in məlumatına görə, bu fikirləri Azərbaycan millisinin baş məşqçisi Robert Prosineçki Serbiya milli komandası ilə yoldaşlıq oyunundan sonra söyləyib.

Mütəxəssis söyləyib ki, oyunda fərdi ustalıq öz sözünü deyib: "Qolların birini standart vəziyyətdən - künc zərbəsindən, ikisini isə uzaq məsafədən vurulmuş zərbələrdən sonra buraxdıq. Ümumilikdə, oyunu təhlil etməli olsaq, birinci hissədən razı qaldım. Serbiya millisi kimi komandalarla başabaş mübarizə apara bilmək üçün çox çalışmalıyıq. Toplanışın gedişindən razıyam".

Baş məşqçi Noreç yığması ilə oyuna daha böyük motivasiya və istəklə hazırlaşmalı olduqlarını vurğulayıb: "Buna nail olsaq, rəqibimizlə eyni səviyyədə oynaya bilərik", - deyə baş məşqçi söyləyib.