Dəri əlcək ustası yarışa qatılacaq Azərbaycan yığma komandasının tərkibinə daxil edilib.

Hərbçilərin 6-cı Dünya Oyunları Cənubi Koreyanın Munqyen şəhərində keçiriləcək. Oktyabrın 2-12-si tarixləri aralığında baş tutacaq yarışda boks yığmamız 7 idmançı ilə təmsil olunacaq. Elvin İsayev oyunlarda 60 kq çəki dərəcəsində rinqə çıxacaq.

Elvin İsayev- boksçu: "İnşallah, layiqincə vuruşub ölkəmizi təmsil edəcəyik. Hazırlığımız da normaldır, necə lazımdırsa, elə də keçib. Yarışa ən güclü idmançılar gələcək. Hərbçilərin yarışı olmasına baxmayaraq güclü idmançılar çıxış edəcək. Hər ölkənin bir nömrəli boksçuları yarışacaq".

Gəncə boks məktəbinin yetirməsi olan Elvin İsayev bu il qatıldığı turnirlərin mükafatçısı olmağı bacarıb. İsayev iştirak etdiyi 4 yarışdan 3-də fəxri kürsüyə yüksəlib. O, Bolqarıstanda Strandja və Bakıda İpək Yolu beynəlxalq turnirində qızıl, Trabzonda Cümhuriyyət Kubokunda bürünc medal qazanıb.

Elvin İsayev- boksçu: "Yaxşı formadayam, idmandı, əvvəlcədən nəsə demək olmur. Amma özümə inanıran. Oradan medalla qayıdacağıma ümid edirəm".

Bakı 2015 ilk Avropa Oyunları və dünya çempionatı kimi mühüm yarışlardan kənarda qalmasına baxmayaraq Elvin İsayev yığmamızın əsas üzvlərindən sayılır. Dəri əlcək ustası yeniyetmələrin ilk Olimpiya Oyunlarının gümüş mükafatçısı və gənclər arasında Avropa çempionudur.

http://kepeztv.az