Şamaxı Olimpiya İdman Kompleksində ölkəmizə bağlılığı ilə tanınan sərbəst güləş üzrə dünya çempionu Oleq Krapivinin 55 illik yubileyinə həsr olunan turnir keçirilib.

Üçüncü dəfə təşkil olunan Respublika yarışında Gəncə güləşçiləri də qüvvəsini sınayıb. 42 komandanın tərkibində 400 idmançının çıxış etdiyi turnirdə iştirakçılar 13 çəki dərəcəsində mübarizə aparıb. Yarışa Nizami Yurdundan qatılan 2 saylı Uşaq Gənclər İdman Məktəbinin yetirmələrindən 35 kq-da Cabbar Məmmədzadə və 38 kq-da İlkin Məmmədov bütün rəqiblərinə qalib gələrək fəxri kürsünün ən yüksək pilləsinə qalxıb.

Cabbar Məmmədzadə- yarışın qalibi: "Həlledici görüşdə Şəmkir idmançısına qarşı mübarizə apardım. Güclü olan rəqibimlə daha əvvəl bir neçə dəfə üz-üzə gəlmişdik və qələbə qazanmışdım. Onunla görüşümüz bu dəfə də çətin oldu, ancaq yenə bacarığımı ortaya qoyaraq rəqibimi məğlub etdim".

İlkin Məmmədov - yarışın qalibi: "Bu yarışa çox ciddi hazırlaşmışdım. 5 rəqiblə güləşdim, çətin olmasına baxmayaraq qalib gəlməyi bacardım. Finaldakı rəqibim mənə bir az çətinlik yaratdı, lakin yekunda ona da qalib gələrək turnirin baş mükafatına sahib çıxdım. Məni yarışa yüksək səviyyədə hazırladığına görə, müəllimim Asif Süleymanova təşəkkür edirəm".

Şamaxıdan yüksək nəticələrlə qayıdan hər iki güləşçi bundan öncə də bir sıra yarışların, o cümlədən beynəlxalq və Respublika səviyyəli turnirlərin mükafatçısı olub.

Asif Süleymanov- 2 saylı UGİM-in sərbəst güləş bölməsinin məşqçi-müəllimi: "Yarış çox yüksək səviyyədə keçirildi. Güclü idmançıların çox olmasına baxmayaraq, yetirmələrimiz bizi layiqincə təmsil etdi. Bu turnirə daha əvvəlcədən çox hazırlaşmışdıq. Uşaqlar da mənim və digər məşqçi-müəllimlərin dediklərinə əməl etdilər. Bəzi görüşlərdə çətinlik çəksələr də, onlar bu yarışda öz sözlərini deyə bildilər".

Sonda turnirin qalibləri kubok, medal və fəxri fərmanla təltif olunub.

http://kepeztv.az