Dağıstanda sərbəst güləş üzrə gənclər arasında beynəlxalq turnir keçirilib. İlk dəfə təşkil edilən yarışda Azərbaycan millisi də iştirak edib. Yığmanın tərkibində Gəncə güləş məktəbinin yetirməsi Murad Süleymanov da yer alıb.

Azərbaycanla yanaşı 7 ölkədən güləşçilərin qatıldığı beynəlxalq turnirdə Süleymanov 74 kq-da döşək üzərinə çıxıb. Məşqçilər korpusu tərəfindən şans verildiyi yarışların əksəriyyətində uğurlu çıxışla yadda qalan idmançı Dağıstanda da fərqlənməyi bacarıb. Gənc güləşçi rəqiblərinə qarşı keçirdiyi bütün görüşləri qələbə ilə başa vurub.
Murad Süleymanov- güləşçi: “İlk dəfə idi ki, bu yarış keçirildi, maraq həddindən artıq çox idi. İstəyirdik qələbə qazanaq, buna da nail olduq. Rəqiblərin hamısı bir-birindən güclü idi. Dörd görüş keçirdim, hamısında da qələbə qazandım”.
Komanda xarakterli yarışda güləşçilərimiz Tacikistan, Şimali Osetiya və Levaşi komandaları ilə bir yarımqrupda mübarizə aparıb. Qrupda yaxşı təsir bağışlayan güləşçilərimiz finala adlayıb. Həlledici mərhələdə isə yığmanın rəqibi digər yarımqrupun qalibi Dağıstan yığması olub.
Murad Süleymanov- güləşçi: “Komandanın heyətində 8 güləşçi vardı. 8 komanda arasında 2-ci yerə çıxdıq. Finalda Dağıstana 6:2 hesabı məğlub olduq. Əfqan Xaşalovla mən görüşləri udduq”.
Murad Süleymanov böyüklərdən ibarət Azərbaycan yığma komandasının da üzvüdür. O, ötən ildən mütamadi olaraq əsas milliyə çağırılır.

http://kepeztv.az/