Bu dəfə onlara ev veriləcəkmi? - Evsiz jurnalistlər danışır

Prezident İlham Əliyev mətbuat işçiləri üçün yaşayış binasının tikintisinin davam etdirilməsi ilə bağlı əlavə tədbirlər haqqında sərəncam imzalayıb. Sərəncamla Azərbaycan mətbuat işçilərinin mənzil şəraitinin yaxşılaşdırılması üçün inşa olunan yaşayış binasının tikintisinin davam etdirilməsi məqsədilə 2016-cı il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna 3 milyon manat ayrılıb.

Qeyd edək ki, 2013-cü ildə Azərbaycan Prezidenti İlham Əliyevin sərəncamı əsasında Bakının Bibiheybət qəsəbəsində jurnalistlər üçün bina tikilib, 155 nəfər jurnalistə ev verilib. Bu zaman evsiz jurnalistlərin bir çoxu evlə təmin olunsa da, sosial vəziyyəti həqiqətən ağır olan, mətbuatda illərdən bəri çalışan, xidmətləri olan bəzi jurnalistlər siyahıdan kənarda qaldı.

"Qaynarinfo.Az" ötən dəfəki siyahıdan kənarda qalan tanınmış jurnalistlərdən açıqlama alıb. Onların bu dəfə evlə təmin olunmaqla bağlı istəklərini öyrənib.

Jalə Mütəllimova: (23 illik iş təcrübəsi var. "Azadlıq" qəzeti, Azadlıq Radiosu, Azərbaycan Dövlət Televiziyası, APA TV-də çalışıb. "Bizim yol" qəzetində redaktordur. Üç övladı var. Hazırda kirayədə yaşayır). "Biz öz işimizi görürük, vətənə, millətə yararlı olmağa çalışırıq. Kim desə ki, diqqətdən kənarda qalmaq ona pis təsir etmir, qeyri-səmimi insandır. Amma bu barədə heç kəsə, heç yerə xüsusi müraciət etmək fikrim yoxdur. Versələr də sağ olsunlar, verməsələr də".









Ləman Əliəşrəfqızı: (20 illik iş təcrübəsi var. "Hürriyyət", "Azadlıq" qəzetlərində, ANS televiziyasında çalışıb. 20-dən çox sənədli filmin müəllifidir. Zərdabi mükafatı laureatı, Əməkdar jurnalistdir. İki övladı var.) "Əlbəttə, biz jurnalistikanın ən çətin dövrünü görmüşük. Şəraitsiz ofislərdə, aşağı məvaciblə işləmişik. Ölkəmiz yeni müstəqil olmuşdu, cəmiyyət hələ azad sözü qəbul etməyə tam hazır deyildi. Bu gün mətbauta diqqət ayrılması müsbət haldır. Dostlarımıza, həmkarlarımıza ev verilməsi bizi sevindirir. Mən də uzun illər kirayədə qalmışam, indiki evim ipotekadadır. Hələ 57 yaşında mənim olacaq. Düşünəndə, gözüm qaralır. Düşünürəm ki, həm cəmiyyətdəki statusum, həm ailə vəziyyətim imkan verir ki, mən də mənzillə təmin olunum."










Ramilə Qurbanlı: (21 illik iş təcrübəsi var. "Ədəbiyyat", "Gənclik P.S", "7 Gün", "Üç nöqtə", "Teleskop", "Yeni zaman", "Gün səhər" qəzetlərində, lent.az, kulis.az saytlarında, APA TV-də çalışıb. Hazırda Prezident Yanında Bilik Fondunun İnformasiya Sektorunda aparıcı məsləhətçidir. Azərbaycanın böyük incəsənət xadimlərinin həyatına həsr olunmuş "33 pərdəli dram" kitabının müəllifidir.) "Bu yerə, bu yaşa, bu təcrübəyə təmiz vicdan, açıq alınla gəldim. Yalnız sevdiyim işimlə məşğul oldum, təmənnasız, iddiasız. Milli mətbuatımızdakı bu kiçicik yerimlə-şərəfimlə, ləyaqətimlə, Zərdabi yoluna sədaqətimlə fəxr edirəm. Mətbuata göstərilən qayğıdan hər birimizə pay çatır. Ev versələr də sağ olsunlar, verməsələr də".









Kəmalə Quliyeva: (21 illik iş təcrübəsi var. "7 gün", "Şərq", "Meqapolis" qəzetlərində, APA İnformasiya Agentliyində işləyib. Hazırda "Lent.az saytında redaktor işləyir. İki övladı var). "1995-ci ildən mətbuatdayam. Həyat yoldaşım Asəf Quliyev də artıq 21 ildir mətbuatdadır. 2001-ci ildən qəzalı yataqxanada yaşayırıq. Dövlətin jurnalistlər üçün yaratdığı imkanların bizə də şamil olunacağına ümid edirik. Hər halda ölkədə hər birinin jurnalistlik təcrübəsi 21 il olan jurnalist ailəsi barmaqla sayılacaq qədərdir. Biz çox istərdik ki, jurnalist ömrümüzü yataqxanada başa vurmayaq".









Tahir Balıyev: (21 illik iş təcrübəsi var. "Teleskop", "Mərkəz", "Yeni Yüzil", "Xalq Cəbhəsi", "Эхо", qəzetlərində, APA-da çalışıb. Hazırda Sputnik.az saytında işləyir. Həyat yoldaşı Ülkər Abdullayeva da jurnalistdir. Üç övladı var. Evsizdir.) "Evlərin bölgüsü məsələsində ədalət prinsipi əsas tutulmalıdır. Təbii ki, insanlar ədaləti müxtəlif cür başa düşə bilərlər. Lakin, mənim üçün əsas jurnalistin özünün mediada sərf etdiyi faydalı iş əmsalı və ehtiyacıdır".









Elməddin Muradlı: (17 illik iş təcrübəsi var. "Üç nöqtə" qəzetində parlament müxbiri, redaktor işləyib. Hazırda Avtosfer.az saytının redaktorudur. İki uşağı var). "Jurnalistika elə bir peşədir ki, burada hansısa təmənnaya görə yox, sırf bu peşəni sevdiyinə görə qalırsan. Amma əgər bu sahəyə dövlət diqqət ayrırsa, buna yalnız sevinmək olar. Hazırda nənəmin Bayılda, sürüşmə zonasında olan daxmasında yaşayırıq. Əlbəttə, mənə ev versələr, çox minnətdar olaram".









İmdad Əlizadə: (17 illik iştəcrübəsi var. "İntibah", "Həftə içi" qəzetində, "Trend" İnformasiya Agentliyində, "Media forum" saytında çalışıb. Hazırda “Report” İnformasiya Agentliyində redaktor işləyir. Parlament Jurnalistləri Birliyinin 2013-cü ilin ən yaxşı media quruluşları və jurnalistlərini müəyyənləşdirmək üçün keçirdiyi sorğunun nəticəsinə “İlin internet jurnalisti” adını alıb. 2015-ci ildə Azərbaycan Prezidenti İlham Əliyevin sərancamı ilə "Tərəqqi" medalı ilə təltif olunub. Bir övladı var. Kirayədə yaşayır.) "Prezident İlham Əliyev jurnalistlər üçün binanın tikilməsi üçün sərəncam imzalayanda və bina tikilməyə başlayanda mənzil problemimi həll eyməyə ümidim yaranıb. Jurnalistlər üçün birinci binanın tikilməsi uzun illər kirayədə yaşayan xeyli sayda həmkarımızın mənzil problemini həll etdi. Bu da çox yaxşı haldır, jurnalistikaya diqqətin bariz nümunəsidir. Hazırda da xeyli sayda evsiz jurnalist var. İkinci binadakı mənzillərin paylanması evsiz olan digər jurnalistlərin çiynindəki böyük bir yükü götürmüş olar. Mən də o yükü daşıyanlardan biriyəm. Ümid edirəm ki, dövlətimiz bu yükü çiyinlərimdən götürməkdə mənə dəstək olacaq. Buna çox böyük ehtiyacım var".