Manat dollara qarşı güclənsə də, bazarlardakı qiymətlər dəyişməz olaraq qalmaqdadır

Marketlərdə qiymətlər dəyişməyib.

Yəni, ərzaq və gündəlik tələbat malları dekabrın sonlarında neçəyə satılırdısa, indi də alıcılara həmin qiymətə təklif olunur. Bəzi marketlərdə cüzi qiymət enmələri müşahidə olunsa da, bir sıra mağazalarda bunun əksini görmək olar.

Dolların manata qarşı ucuzlaşmasından sonra ərzaq məhsullarının qiymətində hər hansı nəzərəçarpacaq ucuzlaşma yoxdur.

Hətta bir sıra məhsulların qiyməti bahalaşıb. Hətta yuyucu toz, toyuq əti, kolbasa və digər ət məhsullarının qiymətində bahalaşma da müşahidə olunmaqdadır.

Adıçəkilən məhsullar son on gün ərzində 10-12 faiz bahalaşıb. Hətta yerli istehsal olan qatıq və digər ağartı məhsullarının da qiymətində 10 faiz nisbətində bahalaşma var.

Belə ki, əvvəl 1,35 qəpik olan 100 qramlıq xama indi alıcılara 1 manat 48 qəpiyə təklif olunur. Günəbaxan və kərə yağları isə nisbi bahalaşıb. Bahalaşma 5-7 faiz arasında dəyişir.

Ulus.Az-ın verdiyi məlumata görə, iqtisadi gərginlik 2017-ci ildə də davam edəcək. Hətta ola bilsin ki, bu gərginlik daha sərt formada olsun. 2017-ci ildə iqtisadiyyatda əsas problem makro iqtisadi sabitliklə bağlı olacaq. Hökumət qarşısında bir sıra vəzifələr duracaq ki, bunları həll etmək çox vacib olacaq. Əsas vəzifə inflyasiya ilə bağlı olacaq.

2017-ci ildə yüksək inflyasiya ölkənin makro iqtisadi sabitliyinə problem yaradacaq. Bu, qiymətlərin qalxmasına səbəb olacaq.

Həmçinin maaşların qiymət artımına adekvat olmadığı aydın şəkildə hiss olunacaq. Bu da sosial gərginlik yaradacaq və əhalinin sosial vəziyyətinin pisləşməsinə gətirib çıxaracaq.

Bu prosesin yumşaq yoxsa kəskin olacağı həm hökumətin davranışından, həm də maliyyə, xüsusən də valyuta bazarındakı vəziyyətdən asılı olacaq.

2017-ci ildə daha bir neçə bank bazarı tərk edəcək. Bu tərk etmə ola bilsin ki, birləşmə şəklində olsun. Yəni hansısa banklar birləşsin, ya da lisenziya geri alınsın. Ümumilikdə, bank sektoru getdikcə kiçilir. İqtisadiyyat kiçildiyinə görə bankların gəlirləri azalır, xərcləri artır.