Ciddi investorları inandırmaq lazımdır ki, ən azı manatın məzənnəsi bu il və ya 2018-ci ildə böyük dəyişikliyə məruz qalmayacaq

Bu olan təqdirdə biz Azərbaycana yeni investisiya dalğasının gəlişinə nail ola bilərik.

Hələlik isə gizli investorlar Azərbaycana gəlmək üçün gözləmə mövqeyindədir. Manatın məzənnəsi sabit olanda gözləmə mövqeyində olan ciddi investorların Azərbaycana gəlməsinə inam yaranacaq.

Müəyyən obyektiv və subyektiv səbəblərə görə Azərbaycan manatı 2015-ci ilin fevralında 34 faiz, oktyabrda isə 48 faiz devalvasiyaya uğrayıb.

Bir il ərzində iki devalvasiyanın başverməsi 10 ballıq şkala ilə əvvəlcə 4 ballıq, sonra isə 7 ballıq zəlzələni xatırladır. Əgər birinci devalvasiya zamanı tədbirlər görülsəydi, ikinci devalvasiya o qədər böyük şok effekti yaratmazdı. Mərkəzi Bank sdəri deyib ki, manat ucuzlaşmayacaq. Əgər onun dediyi baş verməsə investorlar yenə də Azərbaycandan qaçacaq.

Ulus.Az-ın İqtisadiyyat Şöbəsinin xəbərinə görə, devalvasiyanın mənfi fəsadlarının aradan qaldırılması üçün hazırda Azərbaycan hökumətinin ayrı-ayrı strukturları müvafiq addımlar atırlar.

Bunların arasında Dövlət Neft Fondunun da manatın tənzimlənməsi prosesinə qoşulması müsbət haldır. Azərbaycanda “üzən məzənnə”yə mərhələlərlə keçilir.

Azərbaycanda iqtisadi gedişat xarici şirkətlərin bazarı tərk etməsi ilə müşahidə olunur. Artıq “Başak İnam Sığorta” ASC bazarı tərk etmək üçün Maliyyə Bazarlarına Nəzarət Palatasına müraciət edib.

Ölkə vətəndaşı da, xarici şirkətlər də sürətlə ölkədən qaçır. Ölkə vətəndaşı Avropaya mühacirət etmək üçün, xarici sərmayədarlar ölkədən pullarını çıxarmaq üçün yollar axtarır.

Hər gün xarici şirkətlərin ölkədən qaçması, bu gün bu şirkətlərin sırasına daha 5-nin əlavə olunması ölkənin təhlükəli iqtisadi zonaya çevrildiyinin göstəricisidir. Artıq xarici investorlar da bu ölkədə perspektiv görmürlər.

Yerli iş adamları, məmurlar pullarını ölkədən çıxarıb, qonşu ölkələrdə biznes qururlar. Azərbaycanın sığorta bazarı çətin günlərini yaşayır. Ölkədəki iqtisadi böhran və devalvasiya şəraitində sığorta bazarının perspektivləri də qaranlıqdır.