Son günlər Qazaxın mal-qara bazarında qiymətlər xeyli ucuzlaşıb. Bu ucuzlaşma satıcıları qane etməsə də, alıcıların cibinə sərfəlidir. Amma iş orasındadır ki, aşağı qiymətə təklif olunan mal-qaraya alıcı tapmaq bir o qədər də asan olmayıb.

Fərq daha çox iribuynuzlu heyvanların qiymətində hiss olunur. Bu cür ucuzlaşmanın səbəbini sakinlər otun, yemin baha olması ilə əlaqələndirirlər. Quraq keçən hava şəraiti otun qiymətinin artmasına səbəb olub ki, bu da mal bazarına təsirsiz ötüşməyib.
Satışa çıxarılan heyvanlar aşağı qiymətə təklif olunsa da bazar alıcılar azlığı ilə diqqət çəkir. Səbəbini isə alıcılar aldıqları heyvanları daha sonra sata bilməmələri ilə əlaqələndirirlər. Onların sözlərinə görə, hazırda bazarda 600-1000 manata təklif edilən heyvanları, bir neçə ay öncəyə qədər 1200-1500 manata rahat satmaq mümkün idi. Bu gün isə vəziyyət tam başqadır.

Bazarlarda ucuzlaşmanın nə vaxta qədər davam edəcəyi bəlli olmasa da, bayramqabağı vəziyyətin dəyişəcəyi gözlənilir.

kepeztv.az