“Azərbaycan tərəfinin problemləri vardı”

Azərbaycan Dövlət Neft Şirkəti (SOCAR) Gürcüstanda karbamid zavodunun tikintisi üzrə layihə üzərində işi müvəqqəti olaraq dayandırıb.

Azerinfo.az “Biznes-Qruziya” saytına istinadla xəbər verir ki, bu barədə Gürcüstanın energetika naziri Kaxa Kaladze bildirib.

“Bunun səbəbi həm Gürcüstan, həm də Azərbaycan üçün layihənin maliyyə baxımından sərfəli olmamasıdır. Layihə üzərində işi dayandırmaq bizim ümumi qərarımız oldu. Azərbaycan tərəfinin qazla bağlı problemləri var idi, məsələn, bu il biz bizə lazım olan qazın həcmini ala bilməmişik”, - nazir deyib.

Layihənin dayandırılması barədə SOCAR prezidenti Rövnəq Abdullayev də bildirib.

“Bu, Gürcüstan hökuməti ilə müəyyən danışıqları yekunlaşdıra bilmədiyimiz üçün baş verdi”, - o deyib.
Bununla belə, SOCAR rəhbəri layihənin ziyanlı olduğu barədə heç bir söz deməyib, əksinə, onun sözlərinə görə, karbamid zavodunu Sumqayıtda neft emalı zavodu ilə birgə tikmək planlaşdırılırdı.

Layihənin dəyəri 700 milyon avrodur. Tikinti haqqında saziş 2012-ci ildə Gürcüstanın əvvəlki hökumətinin vaxtında əldə olunmuşdu.