“SOCAR Georgia Petroleum” dəfələrlə Gürcüstanın ən böyük vergi ödəyicisi olub, “Ən iri investor-şirkət”, “Ən yaxşı infrastrukturu olan Yanacaqdoldurma məntəqələri”, “Xeyriyyə təşkilatı” nominasiyalarında qalib gəlib. Gürcüstanda SOCAR-ın fəaliyyətini qiymətləndirirlər, çünki şirkət qonşu ölkəni neft, təbii qaz və neft məhsulları ilə təmin etmək və sərmayə qoymaqla yanaşı, eyni zamanda bir növ “humanitar sponsor” kimi də fəaliyyət göstərir.
Bu barədə Media.Az-a gürcü politoloq Vasiliy Papava məlumat verib.

“Fəaliyyət sahəsindən asılı olmayaraq, istənilən şirkət öz dövlətinin siması, nümayəndəsidir. Brend şirkətləri dövlətlər üçün öz maraqlarını təmin etmək üçün effektiv rıçaq sayılır. Bu şirkətlər ölkənin tanınmasına xidmət edir. SOCAR-ın Gürcüstandakı fəaliyyəti barədə də bunu demək olar”, - deyə Vasiliy Papava qeyd edib.
Gürcü politoloqun sözlərinə əsasən, SOCAR Gürcüstanda bir sıra idman federasiyaları, intellektual oyunlar, mədəni tədbirlər vəs.-nin sponsorudur: “Bütün bu fəaliyyətlər əhali arasında SOCAR-ın nüfuzunu artırır, həm şirkətin, həm də təmsil etdiyi ölkənin müsbət imicinin formalaşmasına xidmət edir”.
Vasiliy Papava qeyd edir ki, SOCAR-ın maliyyələşdirdiyi yuxarıda adı sadalanan tədbirkərdən başqa, şirkətin tanınması eyni zamanda KİV-lərlə əməkdaşlıqdan, düzgün PR kampaniyadan, keçirilən sosial tədbirlərdən, məsələn xeyriyyə aksiyalarından asılıdır: “Mənfi və müsbət rəylərə, şikayət və təşəkkürlərə operativ reaksiya verməyə şərait yaradan sosial şəbəkələri də unutmaq olmaz”.

“Mən qeyd etmək istəyirəm ki, Azərbaycan Dövlət Neft Şirkəti Gürcüstanın neft-qaz sektorunda 2006-cı ildən fəaliyyət göstərir. SOCAR Gürcüstanı təbii qaz, neft və neft məhsulları ilə təmin edən əsas şirkətdir. SOCAR Gürcüstanda fəaliyyət göstərdiyi illər ərzində ölkəmizdə müxtəlif layihələrə 1.5 milyard dollar sərmayə qoyub”, - deyə Vasiliy Papava əlavə edib.