Məzənnə elə “üzür” ki, növbəti devalvasiyaya ehtiyac qalmır
“Üzən məzənnə”yə keçid maraqlı mənzərə ortaya çıxarıb. Bizimyol.info portalı Milli Bankın web-saytına istinadən araşdırma aparıb və məlum olub ki, devalvasiya hər gün baş verib.
Yeni məzənnə keçən ilin dekabrın 21-də 1 dollar 1.55 manat olmaqla dəyişib. Yavaş-yavaş bahalaşaraq, ayın və eləcə də ilin sonuna 1.5594-ə çatıb. Müvəqqəti rəsmi stabillik yeni ildə yanvar ayının 5-nə qədər davam edib, həmin gündən 1 dollar 1.561 manata bərabər olub və ayın sonuna qədər bahalaşaraq 1.60 manatdan aşağı düşməyib. Yanvar ayı MB-nin rəsmi məzənnəsində xüsusi dəyişiklik müşahidə olunmasa da həmin vaxt “qara bazar”da dolların 2 manata satıldığını iddia edənlər var. Amma bazar iştirakçıları ilə söhbətimizdən məlum olur ki, dollar heç vaxt 2 manat olmayıb. Baxmayaraq ki, o dövrdə ABŞ valyutası ən yüksək həddə çatıb – 1.84 manat.
Fevralda bir qədər ucuzlaşma müşahidə olunub, bu tendensiya ayın sonuna qədər davam edərək 1.5655 səviyyəsində müəyyənləşib. Martın 1-dən dollar yenə artıma doğru start götürüb və bu dəfə bahalaşma daha sürətlə davam edərək qısa müddətdə 1.6019 olub. Bayram günləri rəsmi məzənnədə müvəqqəti stabillik müşahidə olunsa da “qara bazar”da qiymət yenə artan sürətlə inkişaf edirdi. Bayramdan sonra birdən-birə məzənnə 1.6228 manata çatdı və hər gün təqribən 1 qəpik olmaqla sürətlə artmağa başladı. Martın 11-də 1 dollar 1.6456 manata bərabər olub. Bayram günləri məzənnə stabil olaraq 1.5971 manat qalıb. O vaxt bankların çoxu işləmədiyindən dollar qıtlığı yaranmışdı, hətta söhbət etdiyimiz turistlər bir sıra mağazalarda dollarla alış-veriş etdiklərini söyləyirdilər. Bayramdan sonra adətən camaatın pulu növbəti maaşa qədər tükənir, alış-veriş də azalır, xarici valyutaya təlabat da. Martın 29-dan etibarən nəinki dollarda, eləcə də avro və digər ölkələrin də pul vahidlərində sürətlə ucuzlaşma baş verib. Martın sonuncu günündə dolların rəsmi məzənnəsi artıq 1.5421 manat həddinə çatmışdı.
Aprel ayı dollar üçün prinsipcə sabit keçib, məzənnə 1.53 manatı ötməyib, ayın sonlarına doğru 1 dollar 1.5072 manat civarında müəyyənləşib. May ayı boyunca da məzənnədə xüsusi bir dəyişiklik olmayıb, xarici valyutanın rəsmi məzənnəsi 1.50 və ya 1.51 manat civarında müəyyənləşib. Dollar iyun ayına 1.4918 manatla başlayıb və sonrakı günlərdə də bahalaşma sürətlə davam edib, ayı 1.5394 manatla “qapadıb”. Iyulun 1-də Amerika valyutası 1.5425 manat təyin edilib, sonrakı dövrlərdə artım yenə davam edib, ayın 29-31-i, avqustun 1-nə 1.5851 manat olmaqla sürətlə bahalaşma baş verib. Bahalaşma bu ay daha da intensivləşib. Avqustun 2-i 1 dollar 1.5883, ayın 3-ü 1.5915, bu gün artıq 1.604 manat təşkil edir. Öyrəndiyimizə görə, 4 gündür dolların “qara bazar”da alış qiymti 1.66, satış qiyməti isə 1.67 manatdır. Söhbət etdiyimiz bazar iştirakçısı deyir ki, əgər rəsmi alış 1.67 manata çatarsa “qara bazar”da yanvar ayının rekordu təzələnəcək. Proqnoz da azalan deyil, artan istiqamətədir.